கட்டுநாயக்க விமான நிலையத்தில் போதை பொருளை கடத்துவதற்கு முயற்சித்த வெளிநாட்டு பயணி ஒருவர் கைது செய்யப்பட்டுள்ளார்.
இவர் இன்றைய தினம் கைது செய்யப்பட்டுள்ளதாக எமது விமான நிலைய செய்தியாளர் தெரிவித்தார்.
ரூபாய் ஐந்து கோடி பத்து லட்சம் மதிப்பிடப்பட்ட ‘குஷ்’ போதைப்பொருள் தொகையை வெளியே கொண்டு செல்ல முயன்ற வெளிநாட்டுப் பயணி ஒருரே இவ்வாறு கைது செய்யப்பட்டுள்ளார்.
இவர் 24 வயதான இந்தியப் பிரஜை என்பதோடு, இந்தியாவில் தொலைபேசி பழுதுபார்ப்பவராகப் பணிபுரிபவராவார்.
இன்று 26 அதிகாலை 01.15 மணிக்கு வியட்நாமின் ஹோசிமின் நகரத்திலிருந்து வியட்நாம் ஏயர்லைன்ஸுக்குச் சொந்தமான VN-671 என்ற விமான மூலம் கட்டுநாயக்க விமான நிலையத்தைச் வந்தடைந்துள்ளார்.
அங்கு அவர் கொண்டு வந்த பயணப் பையை கட்டுநாயக்க விமான நிலைய சுங்க போதைப்பொருள் தடுப்புப் பிரிவு அதிகாரிகள் ஸ்கேன் பரிசோதனைக்கு உட்படுத்தியபோதே, ஆடைகளுக்கு மத்தியில் 07 பாக்கெட்டுகளாக மறைத்து வைக்கப்பட்டிருந்த 05 கிலோகிராம் 100 கிராம் எடையுடைய ‘குஷ்’ போதைப்பொருள் தொகை கண்டுபிடிக்கப்பட்டுள்ளது.
பின்னர் இது தொடர்பான மேலதிக விசாரணைகளுக்காக இந்த இந்தியப் பிரஜையும் அவரிடமிருந்து கைப்பற்றப்பட்ட ‘குஷ்’ போதைப்பொருள் தொகையும் கட்டுநாயக்க விமான நிலைய பொலிஸ் போதைப்பொருள் ஒழிப்புப் பணியக அதிகாரிகளிடம் ஒப்படைக்கப்பட்டுள்ளதாகவும் தெரிவிக்கப்பட்டுள்ளது.
