Last Updated:
இந்தியாவின் மிகப்பெரிய ஐபிஓ-வாக இருந்த ஹூண்டாய் மோட்டார் இந்தியா முதல் நாள் முடிவில் வெறும் 18% மட்டுமே விண்ணப்பிக்கப்பட்டிருந்தது.
முகேஷ் அம்பானியின் ரிலையன்ஸ் இண்டஸ்ட்ரீஸ் குழுமத்தின் டிஜிட்டல் மற்றும் தொலைத்தொடர்பு பிரிவான ஜியோ பிளாட்ஃபார்ம்ஸ் லிமிடெட் நிறுவனத்தின் ஆரம்ப பொதுப் பங்கு வெளியீடு (IPO) நேற்று தொடங்கியது. இந்தியாவின் மூலதனச் சந்தை வரலாற்றிலேயே மிகப்பெரிய ஐபிஓ (Rs 30,213 crore) ஆகக் கருதப்படும் இந்த வெளியீடு, தொடங்கிய முதல் நாளிலேயே முதலீட்டாளர்களிடையே மிகப்பெரிய வரவேற்பைப் பெற்று வரலாற்றுச் சாதனை படைத்துள்ளது.
இந்தியப் பங்குச்சந்தையில் இதுவரை வெளியான பெரிய ஐபிஓ-க்களிலேயே மிக வேகமாக, அதாவது பங்குகள் விற்பனைக்குத் திறக்கப்பட்ட 100 நிமிடங்களுக்குள்ளாகவே (100 Minutes) இந்த ஐபிஓ முழு Subscription யை எட்டி புதிய மைல்கல்லைப் பதிவு செய்துள்ளது.
முதல் நாள் வர்த்தக முடிவில், ஒட்டுமொத்தமாக இந்த ஐபிஓ 3.2 மடங்கு (3.2x) விண்ணப்பிக்கப்பட்டுள்ளது. குறிப்பாக, தகுதிவாய்ந்த நிறுவன முதலீட்டாளர்கள் (QIB – Qualified Institutional Buyers) பிரிவில் ஒதுக்கப்பட்ட பங்குகளுக்கு 9.42 மடங்கு (9.42x) அளவுக்கு விண்ணப்பங்கள் குவிந்துள்ளன. இது சர்வதேச மற்றும் உள்நாட்டு நிறுவன முதலீட்டாளர்கள் ஜியோவின் வளர்ச்சி மீது வைத்துள்ள வலுவான நம்பிக்கையைக் காட்டுகிறது.
நிறுவன முதலீட்டாளர்கள் மட்டுமின்றி, பிற அனைத்துப் பிரிவு முதலீட்டாளர்களிடமிருந்தும் சிறப்பான வரவேற்பு கிடைத்துள்ளது. சில்லறை முதலீட்டாளர்கள் பிரிவில் மட்டும் ரூ.6,900 கோடிக்கும் அதிகமான தொகைக்கு விண்ணப்பங்கள் குவிந்துள்ளன. இந்தியாவில் ஒரு ஐபிஓ-வின் முதல் நாளில் சில்லறை முதலீட்டாளர்களால் செலுத்தப்பட்ட அதிகபட்ச தொகை இதுவே ஆகும்.
ஜியோ பிளாட்ஃபார்ம்ஸ் ஐபிஓ-வின் இந்த வேகமான வளர்ச்சி, இதற்கு முன் இந்தியாவில் வெளியான பிற பெரிய ஐபிஓ-க்களின் சாதனைகளை முறியடித்துள்ளது. உதாரணமாக, பஜாஜ் ஹவுசிங் ஃபைனான்ஸ் ஐபிஓ முதல் நாள் பிற்பகல் 2 மணி அளவிலும், எல்ஜி எலக்ட்ரானிக்ஸ் இந்தியா ஐபிஓ முதல் நாள் முடிவிலும் முழுச் சேர்க்கை பெற்றன. ஆனால், இதற்கு முன் இந்தியாவின் மிகப்பெரிய ஐபிஓ-வாக இருந்த ஹூண்டாய் மோட்டார் இந்தியா முதல் நாள் முடிவில் வெறும் 18% மட்டுமே விண்ணப்பிக்கப்பட்டிருந்தது.
ஹூண்டாய் அல்லது எல்ஜி எலக்ட்ரானிக்ஸ் ஐபிஓ-க்கள் போல இது முழுமையாக நிலுவையில் உள்ள பங்குகளின் விற்பனை (OFS) அல்ல. இதில் 27 கோடி புதிய பங்குகள் (Fresh Issue) வெளியிடப்படுகின்றன. இதன் மூலம் திரட்டப்படும் ரூ. 30,213 கோடி நிதியானது ஜியோவின் டிஜிட்டல் இணைப்பு, கிளவுட் உட்கட்டமைப்பு மற்றும் செயற்கை நுண்ணறிவு (AI) சார்ந்த எண்டர்பிரைஸ் சேவைகளை விரிவுபடுத்தவும், நிறுவனத்தின் நிதிநிலையை வலுப்படுத்தவும் பயன்படுத்தப்படவுள்ளது.
