ஜாம்நகர் ரிலையன்ஸ் எண்ணெய் சுத்திகரிப்பு நிலையத்தை பார்வையிட்ட மார்கோ ரூபியோ | India News (இந்தியா செய்திகள்)

அமெரிக்க வெளியுறவுத்துறை அமைச்சர் மார்கோ ரூபியோ மூன்று நாள் பயணமாக இந்தியா வந்துள்ளார். அவரது வருகை இரு நாடுகளுக்கும் இடையிலான நல்லுறவையும், வர்த்தக உறவையும் மேம்படுத்தும் என்ற எதிர்பார்ப்பு அதிகரித்துள்ளது. இதனிடையே  முகேஷ் அம்பானி மற்றும் ரிலையன்ஸ் இண்டஸ்ட்ரீஸ் லிமிடெட் நிர்வாக இயக்குநர் அனந்த் அம்பானி ஆகியோரின் அழைப்பின் பேரில், மார்கோ ரூபியோ மற்றும் இந்தியாவிற்கான அமெரிக்கத் தூதர் செர்ஜியோ கோர் ஆகியோர் ஜாம்நகரில் உள்ள ரிலையன்ஸ் நிறுவனத்தின் உலகின் மிகப்பெரிய சுத்திகரிப்பு ஆலை வளாகத்தை பார்வையிட்டனர்.

உலகின் முன்னணி சுத்திகரிப்பு ஆலையின் பெரிய அளவிலான செயல்பாடுகள், அதிநவீன தொழில்நுட்பங்கள் மற்றும் ஒருங்கிணைந்த உற்பத்தி முறைகளை அவர்கள் ஆய்வு செய்தனர். மேலும், கட்டங்களாகச் செயல்பாட்டுக்குக் கொண்டுவரப்பட்டு வரும் ரிலையன்ஸின் ‘புதிய எரிசக்தி ஜிகா தொழிற்சாலைகள்’ மற்றும் கட்டுமானத்தில் உள்ள தரவு மையங்கள் குறித்தும் அவர்கள் பிரதிநிதிகளுக்கு விளக்கினர். பாரம்பரிய எரிசக்தித் துறை மற்றும் டிஜிட்டல் உள்கட்டமைப்பில் செய்யப்படும் முக்கிய முதலீடுகள் குறித்த தகவல்களும் இந்த விவாதங்களில் இடம்பெற்றன.

ஜாம்நகர் வளாகத்தை ஆழ் தொழில்நுட்பம், புத்தாக்கம் மற்றும் மேம்பட்ட உற்பத்தி ஆகியவற்றின் மையமாக மேம்படுத்துவதற்கான ரிலையன்ஸின் நீண்டகால தொலைநோக்குப் பார்வையை முகேஷ் அம்பானியும் அனந்த் அம்பானியும் பகிர்ந்துகொண்டனர். மாறிவரும் உலகளாவிய எரிசக்திச் சூழல் மற்றும் பாரம்பரிய, புதிய எரிசக்தித் துறைகளில் வர்த்தக ஒத்துழைப்புக்கான சாத்தியக்கூறுகள் குறித்தும் இரு தரப்பினரும் விரிவாகக் கலந்துரையாடினர். தொழில்நுட்பம், பொறியியல் மற்றும் மேம்பட்ட உற்பத்தித் துறைகளில் அமெரிக்க நிறுவனங்களுடன் இணைந்து செயல்படுவதற்கான சாத்தியக்கூறுகளையும் ரிலையன்ஸ் தலைமை எடுத்துரைத்தது.