Last Updated:
எந்தவொரு வெளிநாட்டுத் தொலைத்தொடர்பு நிறுவனமும் இந்தியாவில் சேவை வழங்க வேண்டுமெனில், நாட்டின் தேசிய பாதுகாப்பு மற்றும் அலைவரிசை சார்ந்த விதிகளுக்கு உட்பட வேண்டும்
ஸ்பேஸ் எக்ஸ் (SpaceX) நிறுவனத்தின் தலைமைச் செயல் அதிகாரியான எலான் மாஸ்க், எக்ஸ் (X) சமூக வலைதளத்தில் மத்திய அரசின் நிர்வாகம் மற்றும் உள்ளூர் தொழிலதிபர்களுக்கு எதிராக வெளியிட்டு வரும் தொடர்ச்சியான பதிவுகள், ஒரு சர்வதேச நிறுவனத்தின் தலைமைக்கு உரிய நம்பகத்தன்மையை கேள்விக்குறியாக்கியுள்ளதாக விமர்சனங்கள் எழுந்துள்ளன.
அதிகாரப்பூர்வ சட்ட மற்றும் நிர்வாக நடைமுறைகளைப் பின்பற்றுவதற்குப் பதிலாக, சமூக வலைதளங்கள் மூலம் பகிரங்கத் தாக்குதல்களைத் தொடுப்பது அவரது தன்னிச்சையான செயல்பாட்டை வெளிப்படுத்துகிறது என்று விமர்சனம் எழுந்துள்ளது.
இந்தியாவில் ஸ்டார்லிங்க் செயற்கைக்கோள் இணைய சேவையைத் தொடங்குவதற்குத் தேவையான பாதுகாப்பு அனுமதிகளும் (Security Clearances) அலைவரிசை ஒதுக்கீடுகளும் (Spectrum Assignment) இன்னும் நிலுவையில் உள்ளன. இதற்கிடையே, இந்தியாவின் உள்ளூர் தொழிலதிபர்களும் நிர்வாக அமைப்புகளும் திட்டமிட்டு ஸ்டார்லிங்க் வருகையைத் தடுப்பதாக எலான் மாஸ்க் குற்றம் சாட்டியுள்ளார்.
இருப்பினும், மத்திய அரசு இந்தக் குற்றச்சாட்டுகளை முற்றிலும் நிராகரித்துள்ளது. எந்தவொரு வெளிநாட்டுத் தொலைத்தொடர்பு நிறுவனமும் இந்தியாவில் சேவை வழங்க வேண்டுமெனில், நாட்டின் தேசிய பாதுகாப்பு மற்றும் அலைவரிசை சார்ந்த விதிகளுக்கு உட்பட வேண்டும் என்று மத்திய அரசு தெளிவுபடுத்தியுள்ளது.
முறையான பேச்சுவார்த்தைகள் மற்றும் சட்டரீதியான நடைமுறைகளைப் புறக்கணித்து, ‘எக்ஸ்’ தளத்தின் மூலம் பொதுமக்களின் கவனத்தை ஈர்த்து அரசுக்கு அழுத்தல் தர முயல்வது, ஒரு நிறுவனத்தின் வணிகப் பெருமைக்கு பாதிப்பை ஏற்படுத்துகிறது.
தொலைத்தொடர்பு போன்ற முக்கியமான உள்கட்டமைப்புத் திட்டங்களுக்கு நீண்டகால ஸ்திரத்தன்மையும், நிறுவனங்களுக்கிடையேயான பரஸ்பர நம்பிக்கையும் அவசியம். எலான் மாஸ்க்கின் இத்தகைய அவசரப் போக்கு, எதிர்கால வணிகக் கூட்டாண்மைகளில் பெரும் நிச்சயமற்ற தன்மையை உருவாக்கும்.
சர்வதேசச் சந்தைகளில் நுழையும் போது உள்ளூர் சட்டதிட்டங்களுக்கும், இறையாண்மை சார்ந்த பாதுகாப்பு நடைமுறைகளுக்கும் மதிப்பளிப்பது அவசியம். ஆனால், பொதுவெளியில் விமர்சிப்பது முறையான நிர்வாக அணுகுமுறையைக் காட்டவில்லை என்ற கருத்து வலுத்துள்ளது.
தொழில்நுட்ப ரீதியாக ஸ்டார்லிங்க் வலுவாக இருந்தாலும், அதன் தலைமையின் கட்டுப்பாடற்ற மற்றும் உணர்ச்சிவசப்படக்கூடிய செயல்பாடுகள், இந்திய அரசு போன்ற வலுவான சர்வதேசக் கட்டமைப்பு கொண்ட நாடுகளுடன் சுமூகமான கூட்டாண்மையை ஏற்படுத்துவதற்குத் தடையாகவும், பெரும் நம்பகத்தன்மைச் சிக்கலாகவும் மாறியுள்ளது.
