மோடியின் தலைமையின் கீழ் இந்தியாவின் வளர்ச்சிப் பயணம், இந்தியாவுக்கு மட்டுமல்லாமல் அண்டை நாடுகளுக்கும், ஒட்டுமொத்த உலகளாவிய தெற்கு (Global South) நாடுகளுக்கும் மிகவும் முக்கியத்துவம் வாய்ந்ததாக மாறியுள்ளதாக அவர் வர்ணித்துள்ளார்.
குறிப்பாக, ‘விக்சித் பாரத்’ (Viksit Bharat) எனப்படும் வளர்ச்சியடைந்த இந்தியாவின் இலக்கானது, இந்தியாவின் எல்லைகளைத் தாண்டி பூடான் போன்ற நாடுகளுக்கும் ஆழமான தாக்கத்தை ஏற்படுத்தும் என்று அவர் குறிப்பிட்டுள்ளார். மேலும், இந்தியாவின் வெளியுறவுக் கொள்கையில் அண்டை நாடுகளுக்கு முதலிடம் அளிக்கும் ‘Neighbourhood First’ கொள்கையை பிரதமர் மோடி தொடர்ந்து பின்பற்றி வருவதையும் அவர் வெகுவாகப் பாராட்டியுள்ளார்.
உலகளாவிய தெற்கு நாடுகளின் நலனுக்காக மோடி ஆற்றி வரும் தொடர்ச்சியான முயற்சிகளையும் டோப்கே சுட்டிக்காட்டியுள்ளார். ‘குரலற்ற தெற்கு நாடுகளின் குரல்’ (Voice of Global South) உச்சி மாநாடுகளை நடத்தியதுடன், ஆப்பிரிக்க ஒன்றியத்தை ஜி20 அமைப்பில் நிரந்தர உறுப்பினராகச் சேர்ப்பதற்கு இந்தியா ஆற்றிய வெற்றிகரமான முன்னெடுப்புகள் போன்றவற்றை அவர் தனது கட்டுரையில் சிலாகித்துள்ளார்.
குறிப்பாக, இந்தியாவுக்கும் பூடானுக்கும் இடையிலான உறவை விவரிக்கையில், ‘பாரத் ஃபார் பூடான்’ (B4B – Bharat for Bhutan) என்ற புதிய தத்துவத்தை அவர் அறிமுகப்படுத்தியுள்ளார். கல்வி, சுகாதாரம், சாலைகள், பாலங்கள், புனல் மின்சாரம், தொழில்நுட்பம், விவசாயம் மற்றும் தொழில்முனைவோர் மேம்பாடு என பூடானின் பல்வேறு துறைகளில் இந்தியாவின் நீண்டகால ஆதரவு இன்று இமயமலை நாடான பூடான் முழுவதும் தெளிவாகக் காணப்படுவதாக அவர் தெரிவித்துள்ளார்.
இரு நாடுகளுக்கு இடையேயான பங்காளித்துவம் தற்போது மேலும் வலுவடைந்துள்ளதாகவும், எதிர்கால வளர்ச்சிக்காக பல புதிய பெரிய திட்டங்கள் தீட்டப்பட்டுள்ளதாகவும் பூடான் பிரதமர் குறிப்பிட்டுள்ளார்.
இதற்காக இந்தியாவின் முழுமையான ஆதரவை பிரதமர் மோடி உறுதியளித்துள்ள நிலையில், ரயில் இணைப்புகள், எல்லைக் கட்டமைப்பு வசதிகள், வான்வழி மற்றும் டிஜிட்டல் இணைப்பு மேம்பாடு போன்ற துறைகளில் அதற்கான ஒத்துழைப்பு தற்போது வேகமாக நடைமுறைப்படுத்தப்பட்டு வருகிறது. பூடானின் அடுத்தடுத்த ஐந்தாண்டுத் திட்டங்களில் இந்தியாவின் வரலாற்றுச் சிறப்புமிக்க பங்களிப்பையும் டோப்கே நன்றியுடன் நினைவு கூர்ந்துள்ளார்.
பூடானின் 11-வது ஐந்தாண்டுத் திட்டத்தின் போது இந்தியா அளித்த உதவிகள் தனது முதல் அரசாங்கத்தின் லட்சியத் திட்டங்களை நிறைவேற்ற பெரிதும் உதவியதாக அவர் கூறியுள்ளார்.
இந்தத் தொடர் நட்புறவு 12-வது ஐந்தாண்டுத் திட்டத்திலும் தடையின்றித் தொடர்ந்ததை அவர் சுட்டிக்காட்டினார். குறிப்பாக, 2024-ல் தான் மீண்டும் ஆட்சிக்கு வந்த பிறகு, பூடானின் 13-வது ஐந்தாண்டுத் திட்டத்திற்காக இந்தியாவின் நிதி உதவியை 10,000 கோடி ரூபாயாக இந்தியா உயர்த்தியதை அவர் நன்றியுடன் குறிப்பிட்டார்.
இந்தியாவின் அசுரத்தனமான பொருளாதார வளர்ச்சி, அதன் அண்டை நாடுகளின் வளர்ச்சிக்கு நேரடியாகப் பங்களிக்கும் என்று அவர் உறுதியாக நம்புகிறார். மேலும், பிரதமர் நரேந்திர மோடி கடந்த 2014-ம் ஆண்டு ஜூன் மாதம், தாம் பதவியேற்ற சில வாரங்களிலேயே தனது முதல் வெளிநாட்டுப் பயணமாகப் பூடானைத் தேர்ந்தெடுத்ததை பூடான் பிரதமர் மிகச்சிறந்த தருணமாக நினைவு கூர்ந்துள்ளார். இந்த நிகழ்வு இரு நாடுகளுக்கு இடையேயான வரலாற்றுப் பிணைப்பை மேலும் வலுப்படுத்தியதாகவும் அவர் பெருமிதம் தெரிவித்துள்ளார்.
