கோலாலம்பூர்:
மலேசியாவில் நிலவி வரும் தொடர் வறட்சி மற்றும் எல்லை தாண்டிய புகைமூட்டம் (Haze) காரணமாக, நாடு முழுவதிலும் உள்ள காற்றின் தரம் ஆபத்தான நிலையை எட்டியுள்ளது.
இதன் காரணமாக சிலாங்கூர், மலாக்கா மற்றும் நெகிரி செம்பிலான் ஆகிய மாநிலங்களில் உள்ள அனைத்துப் பள்ளிகளையும் உடனடியாக மூட கல்வி அமைச்சகம் உத்தரவிட்டுள்ளது.
இன்று காலை நிலவரப்படி, நாடு முழுவதும் உள்ள 68 காற்றுத் தரக் கண்காணிப்பு மையங்களில் 38 மையங்கள் சுகாதாரமற்ற (Unhealthy – API 101-200) நிலையைப் பதிவு செய்துள்ளன. நாட்டின் எந்தவொரு பகுதியிலும் ‘நல்ல’ நிலையிலான காற்றின் தரம் பதிவாகவில்லை.
மிக மோசமான காற்றின் தரம் சிரம்பானில் 186 (நாட்டிலேயே அதிகபட்சம்) பதிவாகியுள்ளது. அதனைத் தொடர்ந்து, பண்டாராய மலாக்காவில் 184 ஆகவும், நீலாய், புக்கிட் ரம்பாய், சிகாமாட்டில் 183, ஜோஹான் செத்தியா 182, தங்காட் 181 ஆகவும் பதிவாகியுள்ளது.
காற்றின் தரம் (API) 180-ஐத் தாண்டியுள்ளதால், மாணவர்களின் ஆரோக்கியத்தைப் பாதுகாக்கும் பொருட்டு, சிலாங்கூர், மலாக்கா மற்றும் நெகிரி செம்பிலான் ஆகிய மாநிலங்களில் நேரடி வகுப்புகள் இடைநிறுத்தப்பட்டு, இணையவழி கற்றல் (PdPR) முறைக்கு மாற்றப்பட்டுள்ளன. மேலும், தொடர்ச்சியாக 3 நாட்கள் API அளவு 150-க்கு மேல் பதிவாகும் மாவட்டங்களில் அக்டோபர் 12 முதல் பள்ளிகளை மூட உத்தரவிடப்பட்டுள்ளது.
சுமத்ரா மற்றும் கலிமந்தான் பகுதிகளில் நிலவும் நூற்றுக்கணக்கான காட்டுத்தீச் சம்பவங்கள் மற்றும் தீவிர வறட்சியே இதற்குக் காரணம் என சுற்றுச்சூழல் துறை (DOE) தெரிவித்துள்ளது.அரசாங்கத்தின் நடவடிக்கை: நிலைமை தீவிரமடைந்துள்ளதைத் தொடர்ந்து, மேகங்களைச் செயற்கையாகக் குளிரவைத்து மழை பொழிய வைக்கும் நடவடிக்கைகளை அரசாங்கம் தீவிரப்படுத்தியுள்ளதாகப் பிரதமர் டத்தோஸ்ரீ அன்வார் இப்ராஹிம் தெரிவித்துள்ளார்.
