முல்லைத்தீவு இளைஞர் சேவை அலுவலகம் இடமாற்றம்…! வெடித்த சர்ச்சை

தேசிய இளைஞர் சேவைகள் மன்றத்தின் முல்லைத்தீவு மாவட்டக் காரியாலயத்தை, ஒட்டுசுட்டானில் உள்ள வீதி அபிவிருத்தி அதிகார சபையின் கட்டிடத்திற்கு கொண்டு செல்ல மேற்கொள்ளப்படும் முயற்சிக்கு கடும் எதிர்ப்பு கிளம்பியுள்ளது.

யுத்தம் நிறைவடைந்ததை தொடர்ந்து 2010 ஆம் ஆண்டு தேசிய இளைஞர்கள் சேவைகள்
மன்றமானது முல்லைத்தீவு மாவட்டத்தில் இளைஞர்களுக்கான தனது பணிகளை ஆரம்பித்தது.

இவ்வாறான நிலையில் முல்லைத்தீவு மாவட்டத்தில் தனது பணிகளை ஆரம்பித்த தேசிய
இளைஞர் சேவைகள் மன்றம் தனக்கான ஒரு இடம் இல்லாமையால் ஒட்டுசுட்டான் பிரதேச
செயலக கட்டடத்தின் ஒரு அறையில் தனது பணிகளை ஆரம்பித்தது.

மாவட்ட அலுவலகம் 

இதனை தொடர்ந்து முல்லைத்தீவு மாவட்டத்துக்கான மாவட்டக் காரியாலயத்தை அமைப்பது
தொடர்பில் பேசப்பட்டபோது மாவட்டத்தின் அனைத்து பிரதேச இளைஞர்களின் நலனையும்
போக்குவரத்து வசதிகள் எல்லாவற்றையும் கருத்தில் கொண்டு அனைத்து இளைஞர்கள்
மற்றும் உத்தியோகத்தர்கள் அனைவரதும் ஒருங்கிணைந்த முடிவாக வடமாகாணத்தின்
மையமாகவுள்ள மாங்குளம் நகரில் மாவட்ட அலுவலகம் அமைப்பது என தீர்மானிக்கப்பட்டது.

இந்தநிலையில் அப்போது தேசிய இளைஞளர் சேவைகள் மன்ற முல்லைத்தீவு
மாவட்டத்தின் மாவட்ட இளைஞர் சேவை அதிகாரியும் தற்போதைய தேசிய இளைஞர் சேவைகள்
மன்ற வடமாகாணப் பணிப்பாளருமான கே டி சி காமினி மற்றும்
முல்லைத்தீவு மாவட்டத்தின் உதவிப்பணிப்பாளர் சிசிற செனவிரத்ன மற்றும் தேசிய
இளைஞர் சேவைகள் மன்ற வடமாகாணப் பணிப்பாளரான விமலேஸ்வரி ஸ்ரீகாந்தரூபன்
ஆகியோரின் முயற்ச்சியில் 2012 ஆம் ஆண்டு மாங்குளத்தில் ஒரு காணி பெறப்பட்டு
காணி தூய்மைப்படுத்தப்பட்டு அதற்கான வேலிகள் அமைத்து அறுக்கைப்படுத்தப்பட்டது.

இதைனைத் தொடர்ந்து கட்டிடம் அமைப்பதற்கான கோரிக்கை விடுக்கப்பட்டதோடு
மாங்குளத்தில் வாடகை வீடு ஒன்றில் முல்லைத்தீவு மாவட்டக்காரியாலயம் இயங்க
ஆரம்பித்தது.

அது இன்றுவரை மாங்குளத்தில் வாடகை வீட்டில் இயங்கி வருகிறது.

அன்று முதல் இன்று வரை மாறி மாறி வந்த உதவிப்பணிப்பாளர்களது அக்கறையற்ற
தன்மையால் இதுவரை மாவட்டக் காரியாலயத்துக்கென கட்டிடமொன்றை அமைக்கமுடியாமல்
போயுள்ளது.

மாவட்டக் காரியாலயம்

இவ்வாறான பின்னணியில் இன்றுவரை வாடகை கட்டிடங்களில் தேசிய இளைஞர்
சேவைகள் மன்ற முல்லைத்தீவு மாவட்டக் காரியாலயம் இயங்கி வருகிறது.

ஆனால் திறனற்ற ஒரு நிர்வாக நடவடிக்கையால் தற்போது தேசிய இளைஞர் சேவைகள் மன்ற
மாவட்டக்நகாரியாலயத்தை ஒட்டுசுட்டானில் உள்ள வீதி அபிவிருத்தி அதிகார சபையின்
கட்டிடத்துக்கு கொண்டுசெல்லும் முயற்ச்சி முன்னெடுக்கப்படுகிறது.

இந்த செயற்ப்பாடு காரணமாக குறிப்பாக போக்குவரத்து இடர்பாடுகளுள்ள மாந்தை
கிழக்கு மற்றும் துணுக்காய் பிரதேச செயலக பிரிவு இளைஞர்கள் மிகவும்
பாதிக்கப்படவுள்ளனர்.

வடக்கு மாகாணத்தின் மையப்பகுதியான மாங்குளத்துக்கு வடக்கு மாகாண அலுவலகங்களையே
கொண்டுவருமாறு கோருகின்ற நிலையில் இளைஞர்களுக்கு பொருத்தமற்ற வகையில்
மாங்குளத்தில் ஏ 9 வீதியோரத்தில் உள்ள வழங்கப்பட்ட காணியில் ஒரு கட்டிடத்தை
அமைக்க முயற்ச்சி எடுக்கப்படாது.

இதனை ஒட்டுசுட்டானில் உள்ள வீதி அபிவிருத்தி
அதிகார சபை கட்டிடத்தில் இயக்குவதற்கு முயற்சிப்பது இளைஞர்களிடையே கடும்
அதிருப்தியை ஏற்ப்படுத்தியுள்ளது.

இளைஞர் சேவைகள் 

குறிப்பாக இந்த காணியை பொற்றுக்கொள்ள உழைத்த 2012 காலப்பகுதியில் தேசிய
இளைஞளர் சேவைகள் மன்ற முல்லைத்தீவு மாவட்டத்தின் மாவட்ட இளைஞர் சேவை
அதிகாரியும் தற்போதைய தேசிய இளைஞர் சேவைகள் மன்ற வடமாகாணப் பணிப்பாளருமான கே
டி சி காமினி மற்றும் தற்போதைய ஆளுங்கட்சி நாடாளுமன்ற உறுப்பினர் செல்லத்தம்பி
திலகநாதன் உள்ளிட்டகுழுவினர் ஒட்டுசுட்டானில் உள்ள வீதி அபிவிருத்தி அதிகார
சபை கட்டிடத்தினை பார்வையிட்டுள்ளனர்.

ஆகவே இளைஞர்களின் நலனை கருத்தில் கொண்டு மாங்குளம் நகரில் உள்ள காணியில்
புதிய கட்டடம் ஒன்றை அமைத்து இளைஞர்களின் பணிக்கு ஒத்துழைப்பு வழங்க வேண்டுமே
தவிர பொருத்தமற்ற இடத்துக்கு இந்த அலுவலகத்தை மாற்றக் கூடாது என இளைஞர்கள்
கோரிக்கை விடுத்துள்ளனர்.

அத்தோடு வடமாகாணத்தின் மையமாகவும் மாவட்டத்தின் மையமாக உள்ள மாங்குளத்தில்
உள்ள காணியில் கட்டிடம் அமைத்து உதவ இவர்கள் முன்வர வேண்டுமென மாங்குளம்
பிரதேச மக்கள் சமூக ஆர்வலர்களும் கோரிக்கை விடுக்கின்றனர்.

குறுகிய
நோக்கங்களுக்காக இதனை ஒட்டுசுட்டானுக்கு மாற்ற வேண்டாம் என அவர்கள்
தெரிவித்துள்ளனர்.

கட்டிடம் இல்லையெனில் மாங்குளத்திலும் வீதி அபிவிருத்தி அதிகார சபை
கட்டிடங்கள் உண்டு புதிய கட்டிடம் அமைக்கும் வரை அங்கு தற்காலிகமாக
இயங்கமுடியும் என அவர்கள் மேலும் சுட்டிக்காட்டியுள்ளமை குறிப்பிடத்தக்கது.