இந்திய விமானி ஸ்மித் மச்சாரை இஸ்ரேலில் நடைபெறும் சுதந்திர தின விழாவில் பங்கேற்று தீபச் சுடரை ஏற்றுமாறு பிரதமர் பெஞ்சமின் நெதன்யாகு அழைப்பு விடுத்துள்ளார்.
அபுதாபி மருத்துவமனையில் சிகிச்சை பெற்று வரும் மச்சாருடன் தொலைபேசியில் உரையாடிய நெதன்யாகு, அவரது துணிச்சலைப் பாராட்டியதுடன், இஸ்ரேல், இந்தியா மட்டுமன்றி ஒட்டுமொத்த உலகிற்கும் அவர் ஒரு நாயகன் என தெரிவித்துள்ளார்.
வழக்கமாக இஸ்ரேலிய குடிமக்களுக்கு வழங்கப்படும் சுதந்திர தின தீபச் சுடர் ஏற்றும் கௌரவத்தை இந்த முறை மச்சாருக்கு வழங்க விரும்புவதாகவும், பிரதமர் நரேந்திர மோடியுடன் இணைந்து விழாவில் பங்கேற்குமாறும் நெதன்யாகு அழைப்பு விடுத்துள்ளார்.
கத்தியால் தாக்கிய துணை விமானி
துபாயிலிருந்து டெல் அவிவ் நோக்கி புறப்பட்ட Flydubai FZ1073 விமானத்தில் 174 பயணிகள் மற்றும் விமானப் பணியாளர்கள் இருந்தனர்.
விமானம் 34 ஆயிரம் அடி உயரத்தில் பறந்துகொண்டிருந்தபோது, துணை விமானி கத்தியால் தாக்கியதுடன், விமானத்தை தரையில் மோதச் செய்ய முயன்றதாக தெரிவிக்கப்பட்டுள்ளது.
துணை விமானியின் தாக்குதலில் கண்பார்வை மங்கிய போதிலும், முழு பலத்தையும் திரட்டி விமானி அறையின் கதவை திறந்து பயணிகளை காப்பாற்றியதாக இந்திய விமானி ஸ்மித் மச்சார் தெரிவித்துள்ளார்.
ஆரம்பத்தில் துணை விமானி கதவை தடுத்தபோதிலும், முழு பலத்தையும் பயன்படுத்தி கதவை திறந்ததாக அவர் தெரிவித்துள்ளார். இதையடுத்து பயணிகள் விமானி அறைக்குள் சென்று துணை விமானியை கட்டுப்படுத்தியுள்ளனர்.
துணை விமானி கைது
பின்னர் விமானம் சவூதி அரேபியாவின் தபூக் விமான நிலையத்தில் அவசரமாக தரையிறக்கப்பட்டதுடன், விமானத்தில் இருந்த 182 பேரும் உயிர் தப்பியுள்ளனர்.
தாக்குதலில் காயமடைந்த ஸ்மித் மச்சார் தற்போது அபுதாபி மருத்துவமனையில் சிகிச்சை பெற்று வருகிறார்.
அவருடன் பிரதமர் நரேந்திர மோடி தொலைபேசி மூலம் தொடர்புகொண்டு, பயணிகளின் உயிரைக் காப்பாற்றியதற்காக பாராட்டு தெரிவித்ததாகவும் குறிப்பிடப்பட்டுள்ளது.
இதேவேளை, சம்பவம் தொடர்பில் துணை விமானி கைது செய்யப்பட்டுள்ளதுடன், அமீரக அரசு சிறப்பு புலனாய்வுக் குழுவை அமைத்து விசாரணைகளை முன்னெடுத்து வருகிறது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
