கோலாலம்பூர்:
தொழில்நுட்ப, தொழில்துறைக் கல்வி, பயிற்சிகளுக்காக (TVET) கூடுதலாக 200 மில்லியன் ரிங்கிட்டை ஒதுக்க பிரதமர் ஒப்புதல் வழங்கியுள்ளார்.
ஒற்றுமை அரசாங்கம், தொழில்நுட்பத்தில் கைதேர்ந்த நாடாக மலேசியாவை உருவெடுக்கவைக்க எண்ணம் கொண்டுள்ளது. அந்த வகையில் தொழில்துறை திறன்களைக் கொண்டு ஊழியர்களின் எண்ணிக்கையை அதிகரிக்கும் முயற்சியில் அரசாங்கம் இறங்கியுள்ளது.
மலேசியாவில் TVET வாரத்துக்கான தொடக்க நிகழ்ச்சியில் இந்த அறிவிப்பு இடம்பெற்றது.
கூடுதல் தொகை வழங்கப்படுவதைத் தொடர்ந்து TVET திட்டங்களுக்கு மொத்தமாக சுமார் எட்டு பில்லியன் ரிங்கிட் ஒதுக்கப்படும்.
மேலும் TVET, கல்வி சார்ந்த கொள்கைகளைப் பொறுத்தவரை முக்கியமாக கவனம் செலுத்தப்படவேண்டிய அம்சங்களில் ஒன்றாக ஒற்றுமை அரசாங்கத்தால் அடையாளம் காணப்பட்டுள்ளது.
அன்வார், பிரதமராகப் பதவியேற்ற ஓராண்டில் தொழில்நுட்பத்தை அடிப்படையாகக் கொண்டு இயங்கும் தொழில்துறைகளுக்கு மெருகூட்ட பல பெரிய திட்டங்களை அறிவித்தார். பகுதி மின்கடத்தித் துறையும் சம்பந்தப்பட்டத் துறைகளில் ஒன்றாகும் என்பது குறிப்பிடத்தக்கது.
