Last Updated:
விமானி ஸ்மித் உடன் பிரதமர் மோடி தற்போது பேசினார்.
விமான கடத்தலை தடுக்க முயன்றபோது படுகாயமடைந்த இந்தியாவைச் சேர்ந்த விமானி ஸ்மித் மச்சார் நலமுடன் இருப்பதாக சவுதி அரேபியாவில் உள்ள இந்திய தூதரகம் தெரிவித்துள்ளது.
துபாயில் இருந்து இஸ்ரேலின் டெல் அவிவ் நோக்கிச் சென்ற Flydubai விமானம் வானில் 17 ஆயிரம் அடி உயரத்தில் பறந்து கொண்டிருந்தபோது, முதன்மை விமானியாக இருந்த இந்தியாவைச் சேர்ந்த ஸ்மித் மச்சாரை, துணை விமானியாக இருந்த ஓமனைச் சேர்ந்த நபர் கத்தியால் குத்தினார்.
ஓமனைச் சேர்ந்த துணை விமானியை பயணிகள் பிடித்ததையடுத்து, கத்திக்குத்து காயத்துடன் விமானத்தை இயக்கிய ஸ்மித் மச்சார், அதில் இருந்த 180 பயணிகளை துணிச்சலாக காப்பாற்றினார் பலத்த காயமடைந்த விமானி ஸ்மித் மச்சார் சவுதி அரேபியாவில் தபூக் நகரில் உள்ள மருத்துவமனையில் சிகிச்சைக்காக அனுமதிக்கப்பட்டார். அவரை சந்தித்த ஐக்கிய அரபு அமீரகத்திற்கான இந்திய தூதர், ஸ்மித் மச்சார் நலமுடன் இருப்பதாகவும், நன்றாக சிரித்து உரையாடுவதாகவும் தெரிவித்தார்.
இந்நிலையில், சவுதி அரேபியாவில் உள்ள இந்திய தூதரகம் வெளியிட்டுள்ள எக்ஸ் பதிவில், ஸ்மித் மச்சாரின் உடல்நிலை சீராக இருப்பதாகவும், காயங்களில் இருந்து விரைவில் குணமடைவார் எனவும் தெரிவிக்கப்பட்டுள்ளது. முன்னதாக விமானி ஸ்மித் உடன் பிரதமர் மோடி தற்போது பேசினார். அப்போது இக்கட்டான சூழலில் தீரத்துடன் செயல்பட்டது எப்படி என தனது அனுபவத்தை விமானி ஸ்மித், பிரதமர் மோடியிடம் பகிர்ந்தார். மேலும், விமானி ஸ்மித் விரைவாக உடல்நலம் பெற வேண்டும் என பிரதமர் மோடி வாழ்த்து தெரிவித்தார்.
