Last Updated:
ஈரான் அரசின் பரிந்துரையை நிராகரிப்பதாக டிரம்ப் தெரிவித்துள்ளார்.
ஹோர்முஸ் நீரிணை முற்றிலும் அமெரிக்காவின் கட்டுப்பாட்டில்தான் இருப்பதாக அந்நாட்டு அதிபர் டிரம்ப் தெரிவித்துள்ளார்.
சமீபத்தில் ஐநா பொதுச் சபைக் கூட்டத்தில் பங்கேற்ற பின் நியூயார்க்கில் செய்தியாளர்களைச் சந்தித்த ஈரான் அமைச்சர் அப்பாஸ் அராக்சி, போர் நிறுத்தத்தை முன்மொழிந்துள்ளதாக தெரிவித்தார். மேலும், தங்கள் கோரிக்கைகளை ஏற்றுக்கொண்டால் 7ஆவது நாளில் ஹோர்முஸ் நீரிணை திறக்கப்படும் என்றார்.
இந்நிலையில், ஈரான் அரசின் பரிந்துரையை நிராகரிப்பதாக டிரம்ப் தெரிவித்துள்ளார். ஹோர்முஸ் நீரிணை தனது கட்டுப்பாட்டில் இருப்பதால், அதன் மூலம் ஈரானுக்கு வர வேண்டிய நிதி தடுக்கப்பட்டுள்ளதாக டிரம்ப் தெரிவித்தார். எனவே, அவர்கள் தோல்வியடைந்து வருவதால், நீரிணையை உடனடியாகத் திறக்க வேண்டும் என்றும் அவர் வலியுறுத்தினார். முன்னதாக சர்வதேச அளவில் கச்சா எண்ணெய் மற்றும் இயற்கை எரிவாயு போக்குவரத்தில் மிக முக்கியமான கடல் வழியான ஹோர்மூஸ் ஜலசந்தியை மீண்டும் திறப்பது மற்றும் பிராந்தியத்தில் அமைதியை ஏற்படுத்துவது தொடர்பாக ஈரான் வெளியுறவுத் துறை அமைச்சர் அப்பாஸ் அராக்சி 7 நாட்கள் கெடு கொண்ட வரைபடத் திட்டம் ஒன்றை முன்வைத்தார்.
ஹோர்முஸ் நீரிணை
அதில், அமெரிக்கா தனது முடக்கப்பட்ட 12 பில்லியன் டாலர் நிதியை விடுவிக்க வேண்டும், எண்ணெய் ஏற்றுமதி மீதான தடைகளை நீக்க வேண்டும் மற்றும் கடற்படை முற்றுகையைத் திரும்பப் பெற வேண்டும் என்ற நிபந்தனைகளை ஈரான் விதித்திருந்தது. இருப்பினும், ஈரானின் இந்த 7 நாள் அமைதித் திட்டத்தை அதிபர் டிரம்ப் நிராகரித்துள்ளதாகத் தெரியவருகிறது.
மேலும் ஈரான் எந்தக் சூழ்நிலையிலும் அணுஆயுதத்தைப் பெற முடியாது என்று அமெரிக்க அதிபர் டொனால்ட் டிரம்ப் தனது நிலைப்பாட்டை மீண்டும் உறுதியாகத் தெரிவித்துள்ளார். தனது சமூக ஊடக தளமான ‘ட்ரூத் சோஷியல்’ (Truth Social) பக்கத்தில் பதிவிட்டுள்ள அவர், “ஈரான் எக்காலத்திலும் அணுஆயுதத்தை வைத்திருக்க முடியாது!” என்று ஆங்கிலத்தில் பெரிய எழுத்துக்களில் அழுத்தமாகக் குறிப்பிட்டுள்ளார்.
