சீன ஜனாதிபதி ஷி ஜின்பிங்கை அமெரிக்க ஜனாதிபதி இந்த வாரம் வொஷிங்டனில் வரவேற்க உள்ள நிலையில், இரு நாடுகளுக்கிடையிலான உறவுகளில் முக்கியத்துவம் வாய்ந்த பல விவகாரங்கள் குறித்து இரு தலைவர்களும் பேச்சுவார்த்தை நடத்த உள்ளதாக அமெரிக்க ஊடகங்கள் செய்தி வெளியிட்டுள்ளன.
செயற்கை நுண்ணறிவு (AI), அமெரிக்கா – சீனா வர்த்தகம் மற்றும் தைவான் விவகாரம் ஆகியவை சந்திப்பின் முக்கிய அம்சங்களாக இருக்கும் என எதிர்பார்க்கப்படுகிறது.
ஷி ஜின்பிங் வாஷிங்டனுக்கு வருகை தரும் நிலையில், அவரை ஆண்ட்ரூஸ் விமானப்படைத் தளத்தில் ட்ரம்ப் நேரடியாக வரவேற்க உள்ளதாக தெரிவிக்கப்படுகிறது.
வெள்ளை மாளிகையில் அரசு விருந்து
இதனைத் தொடர்ந்து வெள்ளை மாளிகையில் அரசு விருந்து மற்றும் இராணுவ விமான அணிவகுப்பும் நடைபெறவுள்ளது.
ஷி ஜின்பிங்கின் இந்த அமெரிக்கப் பயணம், 2015ஆம் ஆண்டுக்குப் பின்னர் அவர் மேற்கொள்ளும் முதல் அரசுமுறைப் பயணமாகும்.
மேலும், கடந்த ஓராண்டில் ட்ரம்பும், ஷியும் சந்திப்பது இது மூன்றாவது முறையாகும்.
உலகின் இரண்டு முக்கிய பொருளாதார மற்றும் இராணுவ சக்திகளின் தலைவர்கள் நேரடியாக சந்திக்கும் நிலையில், அவர்களது பேச்சுவார்த்தையின் முடிவுகள் சர்வதேச வர்த்தகம் மற்றும் தொழில்நுட்பத் துறைகளில் தாக்கத்தை ஏற்படுத்தக்கூடும் என எதிர்பார்க்கப்படுகிறது.
மேலும், இந்த இராஜதங்திரத்தில் சீனா தனது நாட்டின் ஒரு பகுதியாகக் கருதும் தைவான் தொடர்பான விவகாரமும் பேச்சுவார்த்தையில் முக்கிய இடம் பெறக்கூடும்.
தைவான் தொடர்பான அமெரிக்காவின் பாதுகாப்பு மற்றும் வெளியுறவுக் கொள்கை நிலைப்பாடுகளுக்கும், சீனாவின் உரிமைக் கோரிக்கைகளுக்கும் இடையே நீண்டகாலமாக கருத்து வேறுபாடு நிலவி வருகிறது.
இந்நிலையில், இரு தலைவர்களின் நேரடி சந்திப்பு இந்த முக்கியமான புவிசார் அரசியல் விவகாரம் தொடர்பான கவனத்தையும் அதிகரித்துள்ளது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
