மத்திய கிழக்கில் ஏற்கனவே கொழுந்துவிட்டு எரியும் போர், செவ்வாய்க்கிழமையன்று மேலும் தீவிரமடைந்துள்ளது. ஐக்கிய அமெரிக்காவின் நட்பு நாடான சவுதி அரேபியா மீது ஹூதிகள் நடத்திய அதிரடித் தாக்குதல்களும், ஈரானின் எண்ணெய் கப்பல்களை அமெரிக்கா தரைமட்டமாக்கிய நிகழ்வும் இப்போரை அடுத்த கட்டத்திற்கு கொண்டு சென்றுள்ளன.
சவுதி நகரங்கள் மீது ஹூதிகள் தாக்குதல்: ஆறு மாதங்களாக நீடிக்கும் இந்தப் போரை மேலும் விரிவுபடுத்தும் வகையில், சவுதி அரேபியாவின் தெற்கு பகுதியில் உள்ள நான்கு முக்கிய நகரங்களை இலக்கு வைத்து ஹூதிகள் தாக்குதல் நடத்தினர். இதில் 73 பேர் காயமடைந்ததுடன், அங்குள்ள முக்கிய எண்ணெய் உற்பத்தி நிலையங்களும் தீப்பற்றி எரிந்தன.
ஈரான் எண்ணெய் கப்பல்களை அழித்த அமெரிக்கா: சவுதி மீதான இந்தத் தாக்குதலால் உலகளாவிய கச்சா எண்ணெய் சந்தை கொந்தளிப்பில் ஆழ்ந்திருந்த வேளையில், அமெரிக்க மத்திய கட்டளைப் பிரிவு ஒரு அதிரடி அறிவிப்பை வெளியிட்டது. செவ்வாய்க்கிழமையன்று ஈரானுக்குச் சொந்தமான ஐந்து கச்சா எண்ணெய் போக்குவரத்து கப்பல்களைத் தங்களது படைப்பிரிவு வெற்றிகரமாக அழித்ததாக அறிவித்தது.
ஈரானின் பாய்ந்த ஏவுகணைகள்: தனது எண்ணெய் கப்பல்கள் அழிக்கப்பட்டதற்குப் பதிலடியாக, ஈரான் உடனடி எதிர்த்தாக்குதலில் இறங்கியது. ஜோர்தானில் உள்ள அல்-அஸ்ரக் அருகே அமைந்திருக்கும் அமெரிக்க இராணுவத் தளத்தின் மீது ஏவுகணைகளை வீசி தாக்குதல் நடத்தியதாக ஈரானின் புரட்சிகர பாதுகாவலர் படை தனது அரசு ஊடகம் வாயிலாக உறுதிப்படுத்தியுள்ளது.
இதுமட்டுமன்றி, அமெரிக்காவின் இரண்டு போர்க்கப்பல்கள் மீதும் தாக்குதல் நடத்தியதாக ஈரான் தெரிவித்துள்ளது.
அடுத்தடுத்த எச்சரிக்கைகள் & சேதம்: போர் மேகம் மேலும் சூழ்ந்துள்ள நிலையில், குவைத் மற்றும் பஹ்ரைன் துறைமுகங்களில் நிறுத்தப்பட்டுள்ள எண்ணெய் கப்பல்களையும் இலக்கு வைக்கப்போவதாக ஈரான் பகிரங்க எச்சரிக்கை விடுத்துள்ளது. இதனிடையே, ஐக்கிய அரபு அமீரகத்தின் கொர் பக்கான் துறைமுகத்தில் நின்றிருந்த திரவ இயற்கை எரிவாயு (LNG) கப்பல் ஒன்று சேதமடைந்துள்ளதாக கடல்சார் பாதுகாப்பு வட்டாரங்கள் தெரிவித்துள்ளன.
