பிரான்ஸிலிருந்து புறப்பட்டு ஆங்கிலக் கால்வாய் ஊடாக பிரித்தானியாவை நோக்கி ஒரே படகில் பயணித்த 140 குடியேற்றவாசிகள் ஹாம்ப்ஷயர் கடற்பரப்பில் பத்திரமாக மீட்கப்பட்டுள்ளனர்.
பிரான்ஸிலிருந்து இங்கிலாந்தை நோக்கி ஒரே காற்று நிரப்பப்பட்ட சிறிய ரப்பர் படகில் ஆபத்தான முறையில் பயணித்த சுமார் 140 குடியேற்றவாசிகள் ஆங்கிலக் கால்வாயில் வைத்து பாதுகாப்பாக மீட்கப்பட்டுள்ளனர். பிரான்ஸின் நோர்மண்டி கடற்கரையிலிருந்து இரவு வேளையில் புறப்பட்ட குறித்த படகு பிரித்தானிய எல்லைக் கடற்பரப்பை அடைந்ததும் உதவி கோரியதை அடுத்து, அரச தேசிய படகுச் சேவைக்குச் சொந்தமான இரு அவசரகால படகுகள் மூலம் அவர்கள் மீட்கப்பட்டு கரைக்கு அழைத்து வரப்பட்டனர்.
ஹாம்ப்ஷயர் கடற்கரையை நோக்கி குறித்த படகு நகர்வதாகக் கிடைத்த தகவலையடுத்து, பிரித்தானிய கடல்சார் மற்றும் கரையோரப் பாதுகாப்பு முகவரகத்தின் ஹெலிகொப்டர், கண்காணிப்பு விமானம், எல்லைப் பாதுகாப்புப் படை, ஹாம்ப்ஷயர் பொலிஸார் மற்றும் அம்பியுலன்ஸ் சேவைப் பிரிவினர் உடனடியாக அந்த பகுதிக்கு அனுப்பி வைக்கப்பட்டனர். பாதுகாப்புக் காரணங்களுக்காக பிரெஞ்சு மீட்புக் குழுவினர் சுமார் பத்து மணித்தியாலங்கள் படகைக் கண்காணித்த பின்னர், ஐல் ஒப் வைட் பகுதியிலிருந்து சென்ற பிரித்தானிய மீட்புப் படகுகள் அவர்களை மீட்டன.
கலே போன்ற வழமையான எல்லைப் பகுதிகளில் பாதுகாப்பு மற்றும் கண்காணிப்பு தீவிரப்படுத்தப்பட்டுள்ளதால், ஆட்கடத்தல்காரர்கள் சுமார் நூற்றெழுபது மைல் தொலைவில் உள்ள நோர்மண்டி போன்ற நீண்ட தூரப் பயணப் பாதைகளைப் பயன்படுத்தத் தொடங்கியுள்ளதாக பிரெஞ்சு அதிகாரிகள் தெரிவித்துள்ளனர். இவ்வாறான சட்டவிரோதக் கடத்தல்களில் பெருமளவு வருமானம் ஈட்டும் நோக்கில் ஒரே படகில் இருநூற்றுக்கும் அதிகமானோரை ஏற்றி அனுப்பும் புதிய உத்திகளை ஆட்கடத்தல் கும்பல்கள் மேற்கொண்டு வருகின்றன.
இதேவேளை, போர்ட்ஸ்மவுத் பகுதியில் மீட்கப்பட்ட குடியேற்றவாசிகள் தரையிறக்கப்பட்ட துறைமுகப் பகுதிக்கு அருகே கூடிய குழுவொன்று, குடியேற்றவாசிகளை அழைத்துச் சென்ற பேரூந்துகளை மறித்து எதிர்ப்பில் ஈடுபட்டதால் அங்கு பொலிஸாருக்கும் ஆர்ப்பாட்டக்காரர்களுக்கும் இடையில் பதற்றமான சூழல் நிலவியது. பின்னர் நிலைமை கட்டுப்பாட்டுக்குள் கொண்டுவரப்பட்டு, உரிய நடைமுறைகளுக்காக அவர்கள் மென்ஸ்டன் தடுப்பு முகாமுக்கு அழைத்துச் செல்லப்பட்டனர்.
சட்டவிரோதப் படகுப் பயணங்களைத் தடுப்பது தொடர்பாக பிரித்தானிய மற்றும் பிரெஞ்சு தலைவர்கள் அண்மையில் பேச்சுவார்த்தை நடத்தியிருந்த நிலையில் இச்சம்பவம் பதிவாகியுள்ளது. இந்த வருடத்தில் சிறிய படகுகள் மூலமான வருகை கணிசமாகக் குறைந்துள்ள போதிலும், கடற்பரப்பில் இவ்வாறான ஆபத்தான பயணங்களைத் தடுப்பதற்கு பிரான்ஸ் கடற்கரைகளில் மேலதிக பாதுகாப்புப் பிரிவினர் குவிக்கப்பட்டு கூட்டு நடவடிக்கைகள் பலப்படுத்தப்பட்டுள்ளதாக பிரித்தானிய உள்நாட்டலுவல்கள் அமைச்சு தெரிவித்துள்ளது.
