ஹங்ரி கோஸ்ட் திருவிழா என்று அழைக்கப்படும் தியோங் குவான் போ தோர் திருவிழா, பினாங்கு மாநில பாரம்பரியமாக அறிவிக்கப்பட்டுள்ளது. இதன் மூலம், மலேசியாவிலேயே இந்தத் திருவிழாவிற்கு இத்தகைய அங்கீகாரத்தை வழங்கிய முதல் மாநிலமாக பினாங்கு திகழ்கிறது.
ஜூன் 25 முதல் நடைமுறைக்கு வந்துள்ள இந்த அங்கீகாரமானது, பினாங்கு சமூகங்களின் பாரம்பரியங்களையும் கலாச்சார பன்முகத்தன்மையையும் பாதுகாப்பதற்காக மாநில அரசு மேற்கொண்ட ஒரு முயற்சியாகும் என்று முதலமைச்சர் சாவ் கோன் இயோவ் கூறினார்.
ஏப்ரல் 8ஆம் தேதியே இத்திருவிழாவை மாநில பாரம்பரியமாக அறிவிப்பதற்கான பரிந்துரைக்கு மாநில அரசு ஒப்புதல் அளித்ததாகவும், அதன் பின்னர் இது குறித்து ஒரு நிபுணரால் ஆய்வு செய்யப்பட்டு மதிப்பிடப்பட்டதாகவும் அவர் தெரிவித்தார்.
இந்த அங்கீகாரம் ஒரு பாரம்பரிய நடைமுறையைப் பாதுகாப்பதற்கும் பேணுவதற்கும் மட்டுமானது அல்ல, மாறாக நமது பல்லின சமூகம் கொண்டாடும் பண்டிகைகளின் பன்முகத்தன்மையை பினாங்கின் அடையாளத்தின் ஒரு பகுதியாக உயர்த்துவதற்காகவுமாகும்.
பினாங்கில், சீன சந்திர நாட்காட்டியின் ஏழாவது மாதத்தில் இந்தத் திருவிழாவைக் கொண்டாடும் 200க்கும் மேற்பட்ட குழுக்கள் பரவலாக உள்ளன,” என்று கொம்தாரில் நடைபெற்ற மாநில பாரம்பரிய அரசிதழ் வெளியீடு குறித்த செய்தியாளர் சந்திப்பில் அவர் கூறினார்.
இதற்கிடையில், கடந்த ஏப்ரல் 8ஆம் தேதி 2011ஆம் ஆண்டின் பினாங்கு மாநில பாரம்பரிய சட்டத்தின் கீழ், ஆறு இடங்களை பாரம்பரிய இடங்களாக அறிவிக்க மாநில அரசு ஒப்புதல் அளித்துள்ளதாக சாவ் கூறினார்.
அந்த ஆறு இடங்கள்: பினாங்கு மலையின் மேல் மற்றும் கீழ் நிலையங்கள் மற்றும் ஃபனிகுலர் இரயில் பாதை மக்காம் டத்தோ கோயா; தாய் பாக் கூங் ஆலயம்; ஃபூய் சியூ சங்கக் கட்டிடம்; லூ புன் ஹாங் ஆலயம்; மற்றும் குவாங்துங் மற்றும் தெங்சோ எண் 1 மயானம் ஆகியவையாகும்.
அக்டோபர் 10ஆம் தேதி நடைபெறவுள்ள மாநில பாரம்பரிய பிரகடனம் மற்றும் பாரம்பரிய இடங்கள் அறிவிப்பு விழாவில், ஹங்ரி கோஸ்ட் திருவிழாவும் இந்த ஆறு பாரம்பரிய இடங்களும் அதிகாரப்பூர்வமாக பிரகடனப்படுத்தப்படும் என்று சாவ் கூறினார்.
இன்று அறிவிக்கப்பட்ட ஆறு இடங்கள் மற்றும் ஹங்ரி கோஸ்ட் திருவிழா உட்பட, இதில் மொத்தம் 15 பாரம்பரிய இடங்கள், 28 பாரம்பரிய உணவு வகைகள் மற்றும் 7 அருவிக் கலாச்சார பாரம்பரிய கூறுகள் அடங்கியுள்ளன என்று அவர் தெரிவித்தார்.
-fmt
