கெடா காவல்துறை தெரிவித்ததாவது, குழந்தையில்லாத திருமணமான தம்பதியரிடம் தனது புதிதாகப் பிறந்த குழந்தையைப் பதிவு செய்வதற்காக, அதன் உயிரியல் தாய்க்கு ரிம 8,000 பணம் வழங்கப்பட்டதாகக் கூறப்படுகிறது.
காவல்துறையினர் தெரிவித்ததன்படி, அந்தக் குழந்தை தற்போது கெடா மாநிலம், சுங்கை பட்டாணியில் உள்ள சுல்தான் அப்துல் ஹலீம் மருத்துவமனையில், கோலா முடா சமூக நலத்துறையின் பராமரிப்பில் உள்ளது.
கடந்த வெள்ளிக்கிழமை, குழந்தை கடத்தலில் ஈடுபட்டதாக சந்தேகிக்கப்படும் ஆறு பேரை கெடா மாநிலம், கோலா மூடா பகுதியில் காவல்துறையினர் கைது செய்தனர். கைது செய்யப்பட்டவர்களில் அந்த ஐந்து நாட்களே ஆன ஆண் குழந்தையின் உயிரியல் தாயும் அடங்குகிறார்.
கெடா மாநில காவல்துறைத் தலைவர் அத்ஸ்லி அபு ஷா கூறுகையில், கைது செய்யப்பட்ட ஆறு பேரில் 24 முதல் 50 வயதுக்குட்பட்ட இரண்டு ஆண்களும் நான்கு பெண்களும் உள்ளனர். அவர்களில், திருமணமாகி கிட்டத்தட்ட ஐந்து ஆண்டுகளாக குழந்தை இல்லாமல் இருந்த ஒரு தம்பதியும் அடங்குவர்.
முதற்கட்ட விசாரணையில், 24 வயதான குழந்தையின் உயிரியல் தாய், குழந்தையில்லாத அந்தப் பெண்ணின் அடையாள ஆவணங்களைப் பயன்படுத்தி கர்ப்ப பரிசோதனைகள் மற்றும் சிகிச்சைகளுக்காக பதிவு செய்ததாகவும், பின்னர் அதே ஆவணங்களைப் பயன்படுத்தி தனியார் மருத்துவமனையில் பிரசவத்திற்கும் பதிவு செய்ததாகவும் தெரியவந்துள்ளது.
“குழந்தை பிறந்த பின்னர், தேசியப் பதிவுத் துறையில் அந்தக் குழந்தை குழந்தையில்லாத பெண்ணின் பெயரில் பதிவு செய்யப்பட்டது,” என்று அத்ஸ்லி கூறியதாக ஹரியான் மெட்ரோ செய்தி வெளியிட்டுள்ளது.
மருத்துவமனையில் ஒரு நோயாளி வேறொருவரின் அடையாள ஆவணங்களைப் பயன்படுத்தி பதிவு செய்திருப்பதை மருத்துவ அதிகாரி ஒருவர் கண்டறிந்து காவல்நிலையத்தில் புகார் அளித்ததைத் தொடர்ந்து விசாரணை தொடங்கப்பட்டது என்று அத்ஸ்லி தெரிவித்தார்.
37 வயதான ஒருவர், இந்தச் சம்பவத்தில் இடைத்தரகராக செயல்பட்டதாக நம்பப்படுகிறது. அவர் மருத்துவமனையின் மகப்பேறு மையத்தில் மருத்துவச் செலவுகளுக்காக சுமார் ரிம 9,000 செலுத்தியதாகவும், உயிரியல் தாய்க்கு ரிம 8,000 வழங்கியதாகவும் கூறியதாக காவல்துறையினர் தெரிவித்தனர்.
“கைது செய்யப்பட்ட பெண்களில் இருவர், 49 வயதான மாமியாரும், 50 வயதான அந்தப் பெண்ணின் அத்தையும் ஆவர். இவர்களுக்கு இடைத்தரகரைத் தெரியும்,” என்று அவர் கூறினார்.
காவல்துறையினர் நான்கு கைப்பேசிகள், மகப்பேறு மையத்துக்கான சந்திப்பு அட்டை, மூன்று ரசீதுகள், மருத்துவமனை வார்டில் சேர்க்கை படிவம் மற்றும் ஒரு காரையும் கைப்பற்றினர்.
கைது செய்யப்பட்ட ஆறு பேரும் விசாரணைக்கு உதவும் வகையில் கடந்த சனிக்கிழமை முதல் 11 நாட்கள் காவலில் வைக்கப்பட்டுள்ளனர்.
தற்போது அந்தக் குழந்தை சுங்கை பட்டாணியில் உள்ள சுல்தான் அப்துல் ஹலிம் மருத்துவமனையில், கோலா மூடா சமூக நலத்துறையின் பராமரிப்பில் உள்ளது.
இந்த வழக்கு 2007ஆம் ஆண்டின் ஆட்கடத்தல் மற்றும் குடியேறிகளை கடத்தல் தடுப்புச் சட்டத்தின் (Anti-Trafficking in Persons and Anti-Smuggling of Migrants Act 2007) பிரிவு 14-ன் கீழ் குழந்தை கடத்தல் தொடர்பாக விசாரிக்கப்பட்டு வருகிறது.
