க.கலை (ரந்தாவ்)
ரந்தாவ் சட்டமன்ற வேட்பாளரான டத்தோஸ்ரீ முகமட் ஹசான், தாமான் இந்தானில் இந்தியச் சமூகத்தினருடன் நடைபெற்ற சந்திப்பு நிகழ்ச்சியில் கலந்து கொண்டு, நெகிரி செம்பிலானில் பாரிசான் நேஷனல் ஆட்சிக் காலத்தில் இந்தியச் சமூகத்தின் முன்னேற்றத்திற்காக பல்வேறு திட்டங்களும் கொள்கைகளும் வெற்றிகரமாக செயல்படுத்தப்பட்டதாகத் தெரிவித்தார். குறிப்பாக, தோட்டத் துறையில் ஏற்பட்ட மாற்றங்களால் தோட்டங்களை விட்டு வெளியேற வேண்டிய சூழ்நிலைக்குள்ளான இந்தியத் தோட்டத் தொழிலாளர்களுக்கு நிரந்தர குடியிருப்புகளை வழங்குவதற்காக சிறப்பு வீட்டுவசதித் திட்டங்கள் உருவாக்கப்பட்டதாக அவர் கூறினார்.
தாம் நெகிரி செம்பிலான் மாநில மந்திரி பெசாராக இருந்த காலத்தில், இரண்டு மற்றும் மூன்று தலைமுறைகளாக தோட்டங்களில் வாழ்ந்த குடும்பங்கள் பாதுகாப்பான வாழ்விடத்தை இழக்காமல் இருப்பதை உறுதி செய்யும் நோக்கில் இந்த வீட்டுவசதிக் கொள்கை அமல்படுத்தப்பட்டதாக அவர் விளக்கினார். “அவர்களுக்கு உதவாமல் இருந்திருந்தால் அவர்கள் எங்கு சென்றிருப்பார்கள்? அதனால்தான் அவர்களுக்காக வீடுகளை கட்டிக் கொடுத்தோம்,” என்று அவர் வலியுறுத்தினார்.
இந்தியச் சமூகத்தின் கல்வி முன்னேற்றத்திற்கும் தேசிய முன்னணி அரசு முக்கியத்துவம் அளித்ததாகக் குறிப்பிட்ட அவர், லடாங் சாகா, லடாங் லின்சும் மற்றும் லடாங் ஷாங்காய் பகுதிகளில் புதிய தமிழ்ப்பள்ளிகள் கட்டப்பட்டதையும், உலகத் தரத்தில் திகழும் ஸ்ரீ செண்டாயான் தமிழ்ப்பள்ளி தனது தலைமையிலான தேசிய முன்னணி அரசின் முயற்சியால் உருவாக்கப்பட்டதாகவும் தெரிவித்தார். “ரந்தாவ் தொகுதியில் வாழும் இந்தியக் குடும்பங்களின் பிள்ளைகளுக்குச் சிறந்த கல்வியை வழங்குவதே எனது பரிசாகும்,” என்றார்.
மேலும், பல தசாப்தங்களாக நீடித்த காட்கோ மற்றும் கம்போங் பாசிர் பகுதிகளின் நில உரிமைப் பிரச்சினைகளுக்கும் தேசிய முன்னணி ஆட்சியில் நிரந்தரத் தீர்வு காணப்பட்டதாக டத்தோஸ்ரீ முகமட் ஹசான் தெரிவித்தார். 40 முதல் 50 ஆண்டுகளாக பட்டா இல்லாமல் வாழ்ந்த குடும்பங்களுக்கும், 47 ஆண்டுகளாக நிலச் சிக்கல்களை எதிர்கொண்ட இந்தியக் குடும்பங்களுக்கும் தனது தலைமையிலான அரசாங்கம் தீர்வு வழங்கியதாகக் கூறிய அவர், இந்தியச் சமூகத்தின் நலன் மற்றும் முன்னேற்றத்திற்கான தனது அர்ப்பணிப்பு தொடரும் என்றும், வரும் தேர்தலில் மக்களின் ஆதரவை எதிர்பார்ப்பதாகவும் தெரிவித்தார்.
