Last Updated:
அயர்லாந்து மற்றும் இங்கிலாந்து அணிகளுக்கு எதிரான டி20 தொடரை இந்திய அணி முழுமையாக இழந்திருப்பது ரசிகர்கள் மத்தியில் அதிருப்தியை ஏற்படுத்தி வருகிறது.
இங்கிலாந்து சுற்றுப்பயணம் மேற்கொண்டுள்ள ஸ்ரேயாஸ் ஐயர் தலைமையிலான இந்திய டி20 கிரிக்கெட் அணி, 5 போட்டிகள் கொண்ட டி20 தொடரை 0-4 என்ற கணக்கில் மோசமாக இழந்துள்ளது ஒரு போட்டி மழையால் கைவிடப்பட்டது. சவுதாம்ப்டனில் நேற்று நடைபெற்ற 5-வது மற்றும் கடைசி டி20 போட்டியில் இங்கிலாந்து அணி 56 ரன்கள் வித்தியாசத்தில் இந்தியாவை வீழ்த்தியது. இந்தத் தொடரில் இந்திய அணியின் பேட்டிங் சொதப்பல் மற்றும் அணித் தேர்வு குறித்து கடுமையான விமர்சனங்கள் எழுந்துள்ளன.
குறிப்பாக, 15 வயதே ஆன இளம் இடதுகை பேட்ஸ்மேன் வைபவ் சூர்யவன்ஷி, கடைசி டி20 போட்டிக்கான ஆடும் லெவனில் இருந்து நீக்கப்பட்டு, அவருக்குப் பதிலாக அனுபவ வீரர் சஞ்சு சாம்சன் சேர்க்கப்பட்டது பெரும் விவாதத்தை ஏற்படுத்தியது.
வைபவ் சூர்யவன்ஷி தான் விளையாடிய 3 போட்டிகளில் முறையே 14, 13 மற்றும் 15 ரன்கள் என சுமாரான பங்களிப்பையே அளித்திருந்தார். இருப்பினும், அவரது குறைவான ரன்கள் மட்டுமே அவர் நீக்கப்பட்டதற்கான முதன்மைக் காரணம் அல்ல என்பதை கேப்டன் ஸ்ரேயாஸ் ஐயர் செய்தியாளர்கள் சந்திப்பில் தெளிவுபடுத்தியுள்ளார்.
அணித் தேர்வில் இருந்த ‘இடது-வலது கை’ பேட்டிங் கலவையே இதற்கு முக்கியக் காரணம் என்று அவர் கூறினார். வைபவ் சூர்யவன்ஷி அணியில் இருந்தபோது, இந்தியாவின் டாப்-7 பேட்டிங் வரிசையில் 6 பேர் இடதுகை பேட்ஸ்மேன்களாக இருந்துள்ளனர். கேப்டன் ஸ்ரேயாஸ் ஐயர் மட்டுமே அந்த வரிசையில் இருந்த ஒரே ஒரு வலதுகை பேட்ஸ்மேன் ஆவார்.
இதுபற்றி கேப்டன் ஸ்ரேயாஸ் கூறுகையில், “இந்த இங்கிலாந்து சூழ்நிலைகளுக்குப் பொருத்தமான சிறந்த பேட்டிங் கலவையை நாங்கள் சோதிக்க விரும்பினோம். தொடக்க வீரர் அபிஷேக் சர்மாவுடன் மறுமுனையில் ஒரு வலதுகை பேட்ஸ்மேன் விளையாடுவது ஆட்டத்திற்கு சாதகமாக இருக்கும் என நினைத்தோம். டாப் ஆர்டரில் இருந்த அனைத்து இடதுகை ஆட்டக்காரர்களுக்கு மத்தியில் நான் ஒருவன் மட்டுமே வலதுகை ஆட்டக்காரராக இருந்தேன். எனவேதான் இந்த மாற்று வியூகம்.” என்று தெரிவித்தார்.
