கோலாலம்பூர்:
காவல் நிலையத் தடுப்புக் காவலில் (Lock-up) வைக்கப்படும் பெண் கைதிகளுக்கான ஆடைகளில் ஷரியா (Syariah) முறைப்படியான ஆடைகளை அறிமுகப்படுத்துவது தொடர்பான முன்மொழிவுகளைப் பரிசீலிக்கவும், மறுஆய்வு செய்யவும் ராயல் மலேசிய போலீஸ் (PDRM) தயாராக இருப்பதாக உள்துறை அமைச்சர் டத்தோஸ்ரீ சைஃபுதீன் நசுத்தியோன் இஸ்மாயில் தெரிவித்துள்ளார்.
நாடாளுமன்ற மக்கள் அவையில் (Dewan Rakyat) ரந்தாவ் பாஞ்சாங் நாடாளுமன்ற உறுப்பினர் டத்தோ சித்தி சைலா முகமட் யூசோப் எழுப்பிய கேள்விக்கு எழுத்துப்பூர்வமாக அளித்த பதிலில் அமைச்சர் இந்தத் தகவலை வெளியிட்டார்.
முஸ்லிம் பெண் கைதிகளின் கண்ணியம் மற்றும் உரிமைகளைப் பாதுகாக்கும் வகையில், ஷரியா முறைப்படியான முறையான ஆடைகளை வழங்குவதற்கும், தற்போதைய நிலையான இயக்க நடைமுறைகளை (SOP) மேம்படுத்துவதற்கும் அரசாங்கம் தயார் நிலையில் உள்ளதா என்று டத்தோ சித்தி சைலா கேள்வி எழுப்பியிருந்தார்.
இதற்குப் பதிலளித்த அமைச்சர் சைஃபுதீன், “தற்போது தடுப்புக் காவலில் வழங்கப்படும் ஆடைகள் பாதுகாப்பு, வசதி, தூய்மை மற்றும் நிர்வாகத் தேவைகளைப் பூர்த்தி செய்யும் வகையில் பொருத்தமானதாகவே உள்ளன. ஆயினும், தொடர்ந்து மாறிவரும் தேவைகள் மற்றும் மேம்பாடுகளுக்கு ஏற்ப, முஸ்லிம் பெண் கைதிகளுக்கான ஷரியா முறைப்படியான ஆடைகள் உட்பட தற்போதைய ஆடைகளைத் தரம் உயர்த்துவதற்கான சாத்தியக்கூறுகளை ஆராய PDRM திறந்த மனதுடன் உள்ளது” என்று குறிப்பிட்டார்.
கடந்த ஏப்ரல் 13-ஆம் தேதி தடுப்புக் காவலில் வைக்கப்பட்ட ஆசிரியை ஒருவர் அணிந்திருந்த ஆடை, முஸ்லிம் ஆடை விதிகளுக்கு உட்பட்டதாக இல்லை எனச் சில தரப்பினர் கேள்வி எழுப்பியதைத் தொடர்ந்து, கைதிகளுக்கான ஆடைகளில் மாற்றங்கள் செய்யப்பட வேண்டும் என்ற கோரிக்கைகள் வலுப்பெற்றது குறிப்பிடத்தக்கது.
தற்போதைய நடைமுறைப்படி, 2025-ஆம் ஆண்டு தடுப்புக் காவல் (திருத்தம்) விதிகளின் (Rule 13A) கீழ், தடுப்புக் காவலில் உள்ள ஒவ்வொரு கைதிக்கும் பொறுப்பு அதிகாரியால் தீர்மானிக்கப்பட்ட ஆடைகள், காலணிகள் மற்றும் இதர அத்தியாவசியத் தேவைகள் வழங்கப்பட வேண்டும் என்பது கட்டாயமாக்கப்பட்டுள்ளதாகவும் அமைச்சர் தனது விளக்கத்தில் சுட்டிக்காட்டினார்.
