ஆரோக்கிய சேது 2.0: ஆயுஷ்மான் பாரத் டிஜிட்டல் திட்டத்தின் கீழ் மத்திய அரசு அறிமுகம் | India News (இந்தியா செய்திகள்)

ஏறக்குறைய 20 கோடி பதிவிறக்கங்களைக் கொண்டுள்ள இந்தச் செயலியானது, மக்களின் அன்றாட சுகாதாரத் தேவைகளை ஒருங்கிணைக்கும் வகையில் வடிவமைக்கப்பட்டுள்ளது. இதன் மூலம் பயனர்கள் தங்கள் ஆயுஷ்மான் பாரத் சுகாதார கணக்கை உருவாக்கவும், செயற்கை நுண்ணறிவு தொழில்நுட்பத்தைப் பயன்படுத்தி மருத்துவ அறிக்கைகளை டிஜிட்டல் முறையில் பதிவேற்றவும் முடியும். மேலும், தனிப்பட்ட சுகாதாரத் தகவல்களைக் கண்காணிப்பதுடன், அணியக்கூடிய சாதனங்களை இதனுடன் இணைத்து உடற்பயிற்சி மற்றும் இதர ஆரோக்கியத் தரவுகளை நிர்வகிக்கலாம்.

இந்தச் செயலியின் பிற முக்கிய அம்சங்களாக பிரதமரின் மக்கள் ஆரோக்கியத் திட்டம் மற்றும் தனியார் காப்பீடு விவரங்களை அறிதல், நிகழ்நேர இரத்த இருப்பு விவரங்கள் , ஆம்புலன்ஸ் முன்பதிவு, குடும்ப உறுப்பினர்களின் விவரங்களை நிர்வகித்தல் மற்றும் மருந்து உட்கொள்வதற்கான நினைவூட்டல்கள் ஆகியவை சேர்க்கப்பட்டுள்ளன. பயனர்களின் தரவு பாதுகாப்பை உறுதி செய்ய ‘எனது ஒப்புதல்’ என்ற அம்சம் வழங்கப்பட்டுள்ளது, இது சுகாதாரத் தகவல்களை யார் அணுகலாம் என்பதை பயனர் தீர்மானிக்க வழிவகுக்கிறது. டிஜிட்டல் சுகாதாரத்தைப் பொதுமக்களிடையே எளிமையாகவும் பாதுகாப்பாகவும் கொண்டு சேர்ப்பதே இந்த 2.0 பதிப்பின் முக்கிய நோக்கமாகும்.