தனது தாயாரின் மறைவால் துயரத்தில் இருந்தபோதும், தொழில்முறை கடமைகளைச் செவ்வனே நிறைவேற்றும் நோக்கில் நடிகர் அஜித் குமார் பிரான்சில் நடைபெற்ற புகழ்பெற்ற ’24-மணிநேர லீ மான்ஸ்’ (24-hour Le Mans) கார் பந்தயத்தில் பங்கேற்று வரலாற்றுச் சாதனை படைத்துள்ளார்.
பிரான்சின் ‘சர்த்’ (Circuit de la Sarthe) சுற்றாடலில் நடைபெற்ற இந்த உலகப்புகழ் பெற்ற பந்தயத்தில், அஜித்தின் ‘அஜித் குமார் ரேசிங்’ (Ajith Kumar Racing) அணி முதன்முறையாகக் களமிறங்கியது.
இந்த வரலாற்றுச் சிறப்புமிக்க நிகழ்வில் பங்கேற்ற முதலாவது இந்திய அணி என்ற பெருமையைப் பெற்றதோடு, முதல் 10 இடங்களுக்குள் (Top-10) வந்து வெற்றி மேடையையும் (Podium finish) அலங்கரித்துள்ளது.
பந்தயத்தின் இடைவேளைகளில், தனது மனைவி ஷாலினி மற்றும் பிள்ளைகளான அனுஷ்கா, ஆத்விக் ஆகியோருடன் அஜித் செலவழித்த தருணங்களைச் சமூக வலைதளங்களில் ஷாலினி பகிர்ந்துள்ளார். “பிரான்சின் ஒரு பகுதி, நிறைய அன்பு” என்ற வாசகத்துடன் அந்த அழகிய குடும்ப தருணங்களை அவர் பதிவிட்டுள்ளார். அஜித் தனது குழந்தைகளுடன் கொஞ்சும் காட்சிகள் ரசிகர்களைப் பெருமளவில் கவர்ந்துள்ளன.
அஜித்தின் தாயார் மோகினி, உடல்நலக்குறைவு காரணமாக கடந்த மே 30-ம் திகதி தனது 85-வது வயதில் காலமானார். தாயாரின் இறுதிச் சடங்குகளில் கலந்து கொண்ட அஜித், தமிழக முதல்வர் மற்றும் சக நடிகர் விஜய், நடிகை திரிஷா உள்ளிட்ட பிரபலங்களின் ஆறுதலைப் பெற்றார்.
தாயாரின் மறைவால் மிகுந்த மனவேதனையில் இருந்தபோதிலும், தொழில்முறை அர்ப்பணிப்பு காரணமாக வெறும் சில நாட்களிலேயே, அதாவது ஜூன் 5-ம் திகதி மீண்டும் பந்தயக் களத்திற்கு அஜித் திரும்பினார். “கனத்த இதயத்துடன் மீண்டும் பணிக்குத் திரும்பியுள்ளேன், ஆனால் வாழ்க்கை தொடர வேண்டும்” என்ற உணர்வுப்பூர்வமான குறிப்புடன் அஜித் குமார் ரேசிங் அணி தனது இன்ஸ்டாகிராம் பக்கத்தில் புகைப்படங்களைப் பகிர்ந்துள்ளது.
