இந்த முறை போட்டிக்கான ஆட்டத்தை விடவும், அதில் பயன்படுத்தப்படவிருக்கும் அதிகாரப்பூர்வ பந்து உலகளவில் பெரும் விவாதத்தையும் ஆச்சரியத்தையும் ஏற்படுத்தியுள்ளது. புகழ்பெற்ற ஸ்பான்சர் நிறுவனமான அடிடாஸ் இம்முறை செயற்கை நுண்ணறிவு (AI) மற்றும் அதிநவீன தொழில்நுட்ப வசதிகளுடன் கூடிய ‘டிரையோண்டா’ (Trionda) என்ற புதிய ஸ்மார்ட் கால்பந்தினை அறிமுகப்படுத்தியுள்ளது.
இந்த ‘டிரையோண்டா’ கால்பந்து சாதாரண பந்துகளைப் போலல்லாமல், ஒரு எலக்ட்ரானிக் கேஜெட் போலவே செயல்படும் திறன் கொண்டது.
இதன் வடிவமைப்பு மிகவும் தனித்துவமானது, ஏனெனில் இது மிகக் குறைவான பேனல்களைக் (துண்டுகள்) கொண்டு தைக்கப்பட்டுள்ளது. இந்த பந்தின் நான்கு பேனல்களில் ஒன்றிற்குள் 500 ஹெர்ட்ஸ் (Hz) வேகமுடைய அதிநவீன மோஷன் சென்சார் சிப் பொருத்தப்பட்டுள்ளது. பந்தின் சமநிலை காற்றில் மாறாமல் இருக்க, சென்சார் இல்லாத மற்ற பேனல்களிலும் சமமான எடை பகிர்ந்தளிக்கப்பட்டுள்ளது.
இந்த பந்தை போட்டி தொடங்குவதற்கு முன்பு 90 நிமிடங்கள் சார்ஜ் செய்ய வேண்டும், அப்போதுதான் இது 6 மணி நேரம் வரை தடையின்றி இயங்கும். காற்றில் பந்து செல்லும் வேகம், அதன் திசை மற்றும் அது சுழலும் வேகம் ஆகியவற்றை இந்த சென்சார் மிகத் துல்லியமாகக் கணக்கிட்டு நடுவர்களுக்குத் தரவுகளை அனுப்பும்.
கால்பந்து போட்டிகளில் ஆஃப்சைட் (Offside) அல்லது ஹேண்ட்பால் (Handball) போன்ற சவாலான முடிவுகளை எடுப்பதில் தற்போதைய ‘வார்’ (VAR) தொழில்நுட்பத்திலும் சில நிமிடங்கள் தாமதம் ஏற்படுகிறது.
இந்தத் தாமதத்தை முற்றிலுமாகத் தவிர்த்து, நடுவர்களின் வேலையை எளிதாக்கவே இந்த சென்சார் சிப் உதவுகிறது. மைதானத்தைச் சுற்றி பொருத்தப்பட்டுள்ள கேமராக்கள் மற்றும் சென்சார்கள் வீரர்களின் நகர்வுகளைக் கண்காணித்து, அவர்களின் முப்பரிமாண (3D) டிஜிட்டல் அவதாரத்தை உருவாக்கும்.
இந்தத் தரவுகளுடன் செயற்கை நுண்ணறிவு தொழில்நுட்பம் இணையும் போது, மிகக் கடினமான முடிவுகளையும் நடுவர்கள் கண் இமைக்கும் நேரத்தில், துல்லியமாக எடுக்க முடியும்.
இதன் மூலம் 1986-ல் மரடோனா அடித்த சர்ச்சைக்குரிய ‘ஹேண்ட் ஆஃப் காட்’ (Hand of God) போன்ற வரலாற்றுத் தவறுகள் இனி நடக்காமல் தடுக்கப்படும்.கடந்த 2010 உலகக்கோப்பையில் பயன்படுத்தப்பட்ட ‘ஜாபுலானி’ பந்து மிகவும் வழுவழுப்பாக இருந்ததால், அதன் திசையைக் கணிப்பது கோல்கீப்பர்களுக்கு சிரமமாக இருந்தது.
ஆனால், புதிய ‘டிரையோண்டா’ பந்தின் மேற்பரப்பு கோல்ஃப் பந்தைப் போல சற்று சொரசொரப்பாகவும், சிறிய பள்ளங்களுடனும் வடிவமைக்கப்பட்டுள்ளது. இது பந்து காற்றில் நிலைதடுமாறாமல் நேராகவும் வேகமாகவும் செல்ல உதவும்.
எனினும், விஞ்ஞானிகளின் ஆரம்பகட்ட ஆய்வில், மிக வேகமாக அடிக்கப்படும் நீண்ட கிக் (Long Kick) காற்றில் உள்ள ஈரப்பதம் காரணமாக எதிர்பார்த்ததை விட சில மீட்டர் முன்னதாகவே கீழே விழ வாய்ப்புள்ளதாகக் கூறப்படுகிறது.
இறுதியாக, இந்த பந்தின் வெளிப்புற வடிவமைப்பு போட்டியை நடத்தும் மூன்று நாடுகளின் ஒற்றுமையைப் பறைசாற்றும் வகையில் அமைந்துள்ளது. வெள்ளை நிற பின்னணியில் சிவப்பு, நீலம் மற்றும் பச்சை நிறங்களுடன் கனடாவின் ‘மேப்பிள் இலை’, மெக்சிகோவின் ‘கழுகு’ மற்றும் அமெரிக்காவின் ‘நட்சத்திர’ குறியீடுகள் இதில் அச்சிடப்பட்டுள்ளன. அதிநவீன தொழில்நுட்பமும், கலாச்சார ஒற்றுமையும் இணைந்த இந்த டிரையோண்டா கால்பந்து, 2026 உலகக்கோப்பையை அடுத்த கட்டத்திற்கு கொண்டு செல்லும் என்பதில் சந்தேகமில்லை என்று விளையாட்டு துறை வல்லுனர்கள் கூறுகின்றனர்.
