இந்தியப் பிரதமராக நரேந்திர மோடி, மிக நீண்ட காலம் தொடர்ச்சியாகப் பதவி வகித்த நேருவின் சாதனையை ஜூன் 10, 2026 அன்று கடக்கவிருக்கும் நிலையில், இவ்விரு தலைவர்களின் ஆட்சிக் காலத்தில் உலக அரங்கில் இந்தியாவின் குரல் எவ்வாறு பரிணாம வளர்ச்சி அடைந்துள்ளது என்பது குறித்த சுவாரசியமான செய்தித் தொகுப்பு வெளியாகியுள்ளது.
இந்தியாவின் முதல் பிரதமரான ஜவஹர்லால் நேரு தனது வாழ்நாளில் மொத்தம் 3 வெளிநாட்டு நாடாளுமன்றங்களில் உரையாற்றியுள்ளார். சுதந்திர இந்தியாவின் ஆரம்பக் காலகட்டமான 1949-இல் அவர் அமெரிக்க நாடாளுமன்றத்திற்குச் சென்றபோது, இரு நாடுகளுக்கும் இடையேயான உறவு ஒரு தொடக்க நிலையிலேயே இருந்தது. அப்போது பனிப்போர் (Cold War) உலக நாடுகளை இரு பிரிவுகளாகப் பிரித்திருந்த சூழலில், நேருவின் ‘அணிசேராக் கொள்கை’ (Non-alignment) மற்றும் சோசலிசப் பார்வையை அமெரிக்கா உற்று நோக்கியது.
அமெரிக்க நாடாளுமன்றத்தில் உரையாற்றிய நேரு, அமெரிக்காவின் ‘மனதையும் இதயத்தையும்’ கண்டறியும் ஒரு தேடலாகவே தனது பயணத்தைக் குறிப்பிட்டார்.
தொழில்நுட்ப மற்றும் இயந்திரவியல் ஒத்துழைப்பை இந்தியா வரவேற்பதாகக் கூறிய அவர், அதே நேரத்தில் இந்தியா தனது கடின உழைப்பால் பெற்ற சுதந்திரத்தை எந்தவொரு பொருள்சார் ஆதாயத்திற்காகவும் விட்டுக் கொடுக்காது என்றும், சுயசார்பையே முதன்மையாக நம்பியிருக்கும் என்றும் மிகவும் எச்சரிக்கையுடனும் தெளிவாகவும் முழங்கினார். அது, உலக நாடுகளின் உதவியை நாடினாலும் எதற்கும் அடிபணியாத ஒரு புதிய சுதந்திர தேசத்தின் குரலாக ஒலித்தது.
இதற்கு நேர்மாறாக, 2014 முதல் 2026 வரையிலான ஆட்சிக் காலத்தில் பிரதமர் நரேந்திர மோடி உலகெங்கிலும் உள்ள 19 வெளிநாட்டு நாடாளுமன்றங்களில் உரையாற்றி, இந்தியப் பிரதமர்களில் மிக உயர்ந்த சாதனையைப் படைத்துள்ளார். இது இந்தியாவின் உலகளாவிய குரல் எவ்வளவு தூரம் விரிவடைந்துள்ளது என்பதற்கான சான்றாகும்.
2014-இல் பதவியேற்றவுடன் பூடான், நேபாளம், ஆஸ்திரேலியா, பிஜி ஆகிய நாடுகளின் நாடாளுமன்றங்களில் உரையாற்றிய அவர், அடுத்தடுத்த ஆண்டுகளில் மொரிஷியஸ், இலங்கை, மங்கோலியா, இங்கிலாந்து, ஆப்கானிஸ்தான், உகாண்டா, மாலத்தீவு, கயானா, கானா, டிரினிடாட் மற்றும் டொபாகோ, நமீபியா மற்றும் எத்தியோப்பியா என உலக வரைபடம் முழுவதும் இந்தியாவின் செய்தியைக் கொண்டு சேர்த்தார்.
2026-ஆம் ஆண்டின் மிகச் சமீபத்திய நிகழ்வாக, இஸ்ரேலின் ‘கினசெட்’ (Knesset) நாடாளுமன்றத்தில் உரையாற்றிய பிரதமர் மோடிக்கு, அந்நாட்டின் உயரிய விருதும் வழங்கி கௌரவிக்கப்பட்டது.
பிரதமர் மோடியின் 2016 மற்றும் 2023 ஆகிய ஆண்டுகளின் அமெரிக்க நாடாளுமன்ற (US Congress) உரைகள், இந்தியா அடைந்துள்ள பொருளாதார பலத்தின் வெளிப்பாடாக அமைந்தன. 2016 உரையில், இந்தியா மற்றும் அமெரிக்கா ஆகிய இரு நாடுகளும் தங்களின் ‘வரலாற்றுத் தயக்கங்களைக்’ கடந்துவிட்டதாகக் குறிப்பிட்ட மோடி, இரு நாடுகளின் உறவு ‘நெருக்கம் மற்றும் வெளிப்படைத்தன்மை’ கொண்டதாக மாறியுள்ளது என்றார்.
தொடர்ந்து 2023-இல், அமெரிக்க நாடாளுமன்றத்தின் கூட்டுக் கூட்டுத்தொடரில் இரண்டு முறை உரையாற்றிய முதல் இந்தியப் பிரதமர் என்ற பெருமையை மோடி பெற்றார். உலக அளவில் இஸ்ரேல் பிரதமர் பெஞ்சமின் நெதன்யாகுவிற்குப் பிறகு இந்த கௌரவத்தைப் பெறும் இரண்டாவது சர்வதேசத் தலைவர் மோடி ஆவார்.
இந்த உரையின் போது, 2014-இல் தான் முதன்முதலில் பிரதமராக வந்தபோது உலகப் பொருளாதாரத்தில் 10-வது இடத்தில் இருந்த இந்தியா, தற்போது 5-வது இடத்திற்கு முன்னேறியுள்ளதை பெருமையோடு சுட்டிக்காட்டிய அவர், “இந்தியா வளரும் போது, ஒட்டுமொத்த உலகமும் வளர்கிறது” என்று முழங்கினார்.
இந்தியாவின் உலகளாவிய தொடர்பை ‘வசுதைவ குடும்பகம்’ (உலகே ஒரு குடும்பம்) என்ற கோட்பாட்டின் மூலம் சர்வதேச அரங்கில் பிரதமர் மோடி நிலைநிறுத்தியுள்ளார். இந்தியாவின் ஜி20 (G20) மாநாட்டின் கருப்பொருளான ‘ஒரே பூமி, ஒரே குடும்பம், ஒரே எதிர்காலம்’ என்பதை இதனுடன் இணைத்து, இந்தியாவின் வளர்ச்சி என்பது உலக நாடுகள் அனைத்தின் நன்மைக்கானது என்பதை உலகத் தலைவர்கள் மத்தியில் அவர் அழுத்தமாகப் பதிவு செய்துள்ளார். 19 வெளிநாட்டு நாடாளுமன்ற அழைப்புகள் என்பது தனிநபர் இராஜதந்திரம் மட்டுமல்லாமல், உலகளாவிய பிரச்சினைகளில் இந்தியாவின் நிலைப்பாடு எவ்வளவு முக்கியத்துவம் வாய்ந்தது என்பதைப் பிற நாடுகள் ஏற்றுக்கொண்டதன் அடையாளமாகவே பார்க்கப்படுகிறது.
