கோலாலம்பூர்:
பினாங்கு மாநிலத்தில் பள்ளி மாணவர்களின் கைகளில் மின்னணு சிகரெட் (Vape) மற்றும் ஆபத்தான போதைப்பொருள் கலந்த வேப் திரவங்கள் புழங்குவதைத் தடுக்கும் பொருட்டு, பள்ளி வகுப்பறைகளுக்குள் நுழைந்து மாணவர்களின் பைகள் மற்றும் உடமைகளை போலீசாரும் பள்ளி நிர்வாகமும் இணைந்து அதிரடியாகச் சோதனை செய்வது குறித்துப் பினாங்கு மாநிலக் காவல்துறை தீவிரமாகப் பரிசீலித்து வருகிறது.
கடந்த ஏப்ரல் 6-ஆம் தேதி பினாங்கு முதலமைச்சர் சாவ் கோன் இயோ தலைமையில் நடைபெற்ற மாநில போதைப்பொருள் ஒழிப்பு நடவடிக்கை கவுன்சில் கூட்டத்தில் இம்முடிவு ஆலோசிக்கப்பட்டது என்று, பினாங்கு மாநிலப் போலீஸ் தலைவர் டத்தோ அசிஸி இஸ்மாயில் (Datuk Azizee Ismail) கூறினார்.
மாணவர்களிடையே ஒழுக்கத்தை மேம்படுத்தவும், போதைப்பொருள் புழக்கத்தைத் தடுக்கவும் பினாங்கு மாநிலத்தில் உள்ள ஒவ்வொரு பள்ளிக்கும் தலா இரண்டு போலீஸ் அதிகாரிகள் (School Liaison Officers) பிரத்தியேகமாக நியமிக்கப்பட்டுள்ளனர்.
இந்த அதிகாரிகள் இரண்டு வாரங்களுக்கு ஒருமுறையாவது பள்ளிகளுக்கு நேரில் சென்று, போதைப்பொருள் ஒழிப்பு முகமையுடன் (AADK) இணைந்து மாணவர்களுக்கு சிறுநீர் பரிசோதனை (Urine Test) மற்றும் உடல் ரீதியான சோதனைகளை (Physical Checks) மேற்கொள்வார்கள்.
இதுவரை பினாங்கு போதைப்பொருள் குற்றப் புலனாய்வுத் துறையினர் மாணவர்களுக்காக 34 விழிப்புணர்வு உரை நிகழ்ச்சிகளை நடத்தியுள்ளனர்.
கடந்த ஏப்ரல் 13 முதல் 17-ஆம் தேதி வரை பினாங்கு முழுவதும் காவல்துறை பல்வேறு அரசு முகமைகளுடன் இணைந்து ‘ஓப் வேப் 1/2026’ என்ற அதிரடிச் சோதனையை நடத்தியது.
இந்தச் சோதனையின் போது, RM 49,800 அபராதம்: ‘பொது சுகாதாரப் புகைபிடித்தல் பொருட்கள் கட்டுப்பாட்டுச் சட்டம் 2024-இன் (சட்டம் 852)’ கீழ், சுகாதார அமைச்சில் பதிவு செய்யாமல் வேப் பொருட்களை விற்றது மற்றும் விளம்பரம் செய்தது போன்ற குற்றங்களுக்காக மொத்தம் RM 49,800 மதிப்புள்ள அபராத நோட்டீஸ்கள் விநியோகிக்கப்பட்டன.
சோதனையின் போது RM 4,951 மதிப்புள்ள வேப் திரவங்கள் மற்றும் கருவிகள் பறிமுதல் செய்யப்பட்டன. மேலும், கஞ்சா (THC) கலந்த போதை வேப் பயன்படுத்திய நபர் ஒருவரும் 1952-ஆம் ஆண்டு ஆபத்தான போதைப்பொருள் சட்டத்தின் கீழ் கைது செய்யப்பட்டார்.
கடந்த 2025 ஜனவரி முதல் நடப்பு மே மாதம் வரையிலான காலகட்டத்தில் மட்டும், போதைப்பொருள் கலந்த வேப் திரவங்கள் மற்றும் கடத்தல் தொடர்பாகப் பினாங்கில் மொத்தம் 115 வழக்குகள் பதிவு செய்யப்பட்டு, 207 பேர் அதிரடியாகக் கைது செய்யப்பட்டுள்ளனர் என டத்தோ அசிஸி இஸ்மாயில் தெரிவித்துள்ளார்.
பள்ளிப் பருவத்திலேயே மாணவர்கள் செயற்கை போதைப்பொருள் கலந்த வேப் திரவங்களுக்கு அடிமையாகித் தங்களின் எதிர்காலத்தைச் சீரழித்துக் கொள்வதைத் தடுக்க, இந்த கூட்டு வகுப்பறைச் சோதனை திட்டம் மிக விரைவில் மாநிலம் முழுவதும் உள்ள பள்ளிகளில் அமல்படுத்தப்படும் என எதிர்பார்க்கப்படுகிறது.
