நள்ளிரவில் நாய் குரைப்பது கெட்ட சகுனம் என்ற நம்பிக்கை பலரிடம் உள்ளது. ஆனால் அதற்குப் பின்னால் இருக்கும் உண்மையான அறிவியல் காரணங்கள் என்ன? நாய்களின் நடத்தை மற்றும் இரவு நேர குரைப்பின் உண்மை காரணங்களை அறிந்து கொள்ளுங்கள்.
நள்ளிரவில் நாய் குரைக்கும் சத்தம் பலருக்கும் ஒரு வித அச்சத்தையும் பதற்றத்தையும் ஏற்படுத்துகிறது. குறிப்பாக கிராமப்புறங்களிலும் பாரம்பரிய நம்பிக்கைகள் அதிகமாக உள்ள சமூகங்களிலும், இரவு நேரத்தில் நாய் குரைப்பது அல்லது ஊளையிடுவது கெட்ட சகுனம் என கருதப்பட்டு வருகிறது. சிலர் இதை மரணம், ஆபத்து அல்லது அமானுஷ்ய சக்திகளின் அறிகுறியாகவும் நம்புகின்றனர்.
பழமையான நாட்டுப்புறக் கதைகள் மற்றும் மரபு நம்பிக்கைகள் காரணமாக இந்த எண்ணம் தலைமுறைகளாக பரவி வந்துள்ளது. மனிதர்களால் உணர முடியாத சில விஷயங்களை நாய்கள் உணரக்கூடும் என்ற கருத்து, இந்த நம்பிக்கைகளை மேலும் வலுப்படுத்தியது. ஆனால் இதற்கு அறிவியல் ரீதியான ஆதாரங்கள் எதுவும் இல்லை.
அறிவியல் பார்வையில் பார்த்தால், நாய்கள் இரவில் அதிகமாக குரைப்பதற்கு பல இயல்பான காரணங்கள் உள்ளன. இரவு நேரத்தில் சுற்றுப்புறம் அமைதியாக இருப்பதால், மிகவும் சிறிய சத்தங்கள்கூட நாய்களின் காதுகளுக்கு தெளிவாக கேட்கும். மனிதர்களால் கவனிக்க முடியாத காலடிச் சத்தம், வாகன அதிர்வு அல்லது சிறிய விலங்குகளின் அசைவு போன்றவற்றை நாய்கள் எளிதில் உணர்கின்றன.
நாய்களின் கேட்கும் திறன் மற்றும் மணத்தை உணரும் திறன் மனிதர்களைவிட பல மடங்கு அதிகமாக இருப்பதால், இரவு நேரத்தில் அவை அதிக விழிப்புடன் செயல்படுகின்றன. இதனால் அந்நியர்கள், தெரு விலங்குகள் அல்லது புதிய சத்தங்கள் இருந்தால் உடனடியாக குரைத்து எச்சரிக்கை செய்கின்றன.
மேலும், நாய்கள் இயற்கையாகவே தங்கள் பகுதியையும் குடும்பத்தினரையும் பாதுகாக்கும் குணம் கொண்டவை. வீட்டில் அனைவரும் தூங்கும் நேரத்தில் பாதுகாப்பு குறைந்துவிட்டதாக அவை உணரக்கூடும். அதனால் தான் இரவில் அவை அதிக கவனத்துடன் இருந்து குரைக்கின்றன.
சில நேரங்களில் நாய்களின் மனநிலையும் இதற்குக் காரணமாக இருக்கலாம். தனிமை, சலிப்பு, போதிய உடற்பயிற்சி இல்லாமை அல்லது உரிமையாளரை பிரிந்திருக்கும் மனஅழுத்தம் காரணமாகவும் அவை இரவில் குரைக்கக்கூடும். பகலில் கவனம் சிதறச் செய்யும் விஷயங்கள் அதிகமாக இருக்கும் நிலையில், இரவில் அமைதி அதிகமாக இருப்பதால் அவை தங்களின் உணர்ச்சிகளை குரைத்துப் வெளிப்படுத்துகின்றன.
வயது முதிர்ந்த நாய்களில் உடல்நலப் பிரச்சினைகளும் இரவு நேர குரைப்பிற்கு காரணமாக இருக்கலாம். மனிதர்களுக்கு ஏற்படும் நினைவாற்றல் குறைபாடு போன்ற பிரச்சினைகள் நாய்களுக்கும் ஏற்படலாம். அதேபோல் உடல் வலி, பார்வை குறைபாடு அல்லது கேட்கும் திறனில் மாற்றம் ஏற்பட்டாலும் அவை அசாதாரணமாக குரைக்கலாம்.
அதனால், நள்ளிரவில் நாய் குரைப்பது என்பது எந்தவொரு கெட்ட சகுனமும் அல்ல. அது ஒரு இயல்பான விலங்கு நடத்தை மட்டுமே. இதைப் பயத்துடன் பார்க்காமல், அதன் பின்னால் உள்ள காரணங்களை புரிந்துகொள்வதே சரியான அணுகுமுறை.
