முடிவிற்கு வரும் ஈரான் போர் :ட்ரம்ப் வெளியிட்ட அறிவிப்பு

போரை முடிவிற்கு கொண்ட வரும் வகையில் அமெரிக்காவுடன் ஒரு உடன்படிக்கையை எட்டுவதற்கு ஈரான் “மிகவும் நெருங்கி வருகிறது” என்று அமெரிக்க ஜனாதிபதி டொனால்ட் ட்ரம்ப் கூறியுள்ளார். அதே நேரத்தில், கடந்த வாரத்தில் முன்னேற்றம் ஏற்பட்டுள்ளதாக தெஹ்ரானும் சமிக்ஞை அளித்துள்ளது.

இருப்பினும், இரு தரப்பினரும் எச்சரிக்கையுடன் இருந்து வருகின்றனர்.
மேலும், அணு ஆயுதங்கள் குறித்த முக்கிய பிரச்சினை எந்தவொரு ஆரம்பகட்ட முன்மொழிவுகளிலும் இடம்பெறாது என்று ஈரானின் வெளியுறவு அமைச்சக செய்தித் தொடர்பாளர் கூறினார்.

ஈரானுடனான ஒரு வரைவு உடன்படிக்கையை பார்த்த ட்ரம்ப்

ஈரானுடனான ஒரு வரைவு உடன்படிக்கையைத் தான் பார்த்ததாக ட்ரம்ப்,சிபிஎஸ் நியூஸிடம் தெரிவித்தார். அது போதுமானதாக உள்ளதா என்று கேட்டபோது, ​​”எனக்குத் தெரியாது, அதை என்னால் உங்களுக்குச் சொல்ல முடியாது” என்று அவர் கூறினார்.

அந்த வரைவு குறித்து ட்ரம்ப் மேலும் எந்த விவரங்களையும் அளிக்கவில்லை, ஆனால் எந்தவொரு உடன்படிக்கையும் ஈரான் அணு ஆயுதம் பெறுவதை “நிச்சயமாக” தடுக்கும் என்று அவர் வலியுறுத்தினார்.

“நாம் விரும்பும் அனைத்தும் கிடைக்கும் ஒரு ஒப்பந்தத்தில் மட்டுமே நான் கையெழுத்திடுவேன்,” என்று அவர் கூறினார். “நாம் ஒரு உடன்படிக்கைக்கு வருவோம், அல்லது அவர்கள் இப்போது தாக்கப்படவிருப்பது போல் வேறு எந்த நாடும் இதற்கு முன் ஒருபோதும் தாக்கப்படாத ஒரு சூழ்நிலையை நாம் சந்திப்போம்.”

ஈரானிலிருந்து வெளியான அறிவிப்பு

ஈரானிய வெளியுறவு அமைச்சகத்தின் செய்தித் தொடர்பாளர் இஸ்மாயில் பாகாயி, சனிக்கிழமையன்று அரசு தொலைக்காட்சியில் பேசுகையில், கடந்த வாரத்தில் அமெரிக்க மற்றும் ஈரானிய நிலைப்பாடுகள் ஒருங்கிணைகின்றன, ஆனால் முக்கிய பிரச்சினைகளில் ஒப்பந்தங்கள் எட்டப்படும் என்று அர்த்தமில்லை என எச்சரித்ததோடு, அமெரிக்கர்கள் “முரண்பாடான அறிக்கைகளை” வெளியிடுவதாகவும் குற்றம் சாட்டினார்.

“முதலில் 14 அம்சங்களைக் கொண்ட ஒரு கட்டமைப்பு வடிவத்தில், புரிந்துணர்வு ஒப்பந்தம் அல்லது ஒரு உடன்படிக்கையை வரைவு செய்வதே எங்கள் திட்டமாக இருந்து வருகிறது,” என்று அவர் கூறியதாக ரொய்ட்டர்ஸ் செய்தி நிறுவனம் தெரிவித்துள்ளது.

அந்தப் புரிந்துணர்வு ஒப்பந்தத்தை இறுதி செய்யும் பணியில் தாங்கள் ஈடுபட்டுள்ளதாகவும், எனவே 30 முதல் 60 நாட்களுக்குள் மேலதிகப் பேச்சுவார்த்தைகள் நடத்தப்பட்டு, “இறுதியில் ஒரு இறுதி உடன்படிக்கை எட்டப்படும்” என்றும் பாகாயி கூறினார்.