இலங்கையின் மிக மதிப்பிற்குரிய மூத்த ஊடகவியலாளரும், அரசியல் ஆய்வாளருமான டி.பி.எஸ்.ஜெயராஜ் (D.B.S. Jeyaraj), தனது 72-ஆவது வயதில் கனடாவில் காலமானார்.
கடந்த பல தசாப்தங்களாக இலங்கையின் இன ரீதியான அரசியல், உள்நாட்டு யுத்தம் மற்றும் சமகால அரசியல் நகர்வுகள் குறித்து ஆழமான செய்திகளையும், காத்திரமான அரசியல் பகுப்பாய்வுகளையும் வழங்கி வந்ததன் மூலம் அவர் உலகெங்கிலும் உள்ள வாசகர்களிடையே பரவலாக அறியப்பட்டிருந்தார்.
அவர் ‘டெய்லி மிரர்’ (Daily Mirror) ஆங்கில நாளிதழின் முதன்மைப் பங்களிப்பாளர்களில் ஒருவராக விளங்கியவர் என்பது குறிப்பிடத்தக்கது. அந்நாளிதழில் இலங்கை அரசியல் மற்றும் வரலாற்றுப் பின்னணிகளை மையமாகக் கொண்டு, அவர் தொடர்ச்சியாக எழுதி வந்த அரசியல் கட்டுரைகள் வாசகர்கள் மத்தியில் பெரும் வரவேற்பைப் பெற்றிருந்தன.
தனது நீண்டகால ஊடகப் பயணத்தில் இலங்கையின் இன உறவுகள், உள்நாட்டுப் போர் மற்றும் நல்லாட்சி தொடர்பான விவகாரங்களை விரிவாகக் கையாண்டதன் மூலம், அரசியல் விமர்சன உலகிலும் பகுப்பாய்வுத் துறையிலும் ஒரு தவிர்க்க முடியாத ஆளுமையாக அவர் திகழ்ந்தார். அவரின் மறைவு ஊடகத் துறைக்குப் பேரிழப்பாகும்.
