Malaysia Tamilnadu | “நண்பர் விஜய்க்கு மனமார்ந்த வாழ்த்துகள்” – மலேசிய பிரதமர் வாழ்த்து! | World News (உலக செய்திகள்)

“திரைப்படப் புரட்சி நிஜமானது”

தமிழக சட்டப்பேரவைத் தேர்தலில் மிகப்பெரிய வெற்றியைப் பெற்று, தமிழகத்தின் அடுத்த முதலமைச்சராகப் பொறுப்பேற்கவுள்ள விஜய்க்கு உலகத் தலைவர்கள் பலரும் தங்களது வாழ்த்துகளைத் தெரிவித்து வருகின்றனர். அந்த வகையில், மலேசியப் பிரதமர் அன்வர் இப்ராஹிம் தனது அதிகாரப்பூர்வ எக்ஸ் (X) தளத்தில் நெகிழ்ச்சியான வாழ்த்துச் செய்தியைப் பகிர்ந்துள்ளார்.

அதில் அவர், “திரையில் மூன்று மணி நேரத்திற்குள் ஊழல்வாதிகளையும், வில்லன்களையும் வீழ்த்தும் நாயகனாக விஜய்யை அவரது ரசிகர்கள் கண்டு ரசித்தனர். ஆனால், தற்போது அதைவிடப் பெரிய பொறுப்பை (முதலமைச்சர் பதவி) தமிழக மக்கள் அவரிடம் ஒப்படைத்துள்ளனர்” என்றுள்ளார்.

மலேசிய பிரதமர்

மேலும் விஜய்யின் ‘சர்க்கார்’ திரைப்படப் பாடலான “ஒரு விரல் புரட்சி” என்ற வரிகளைக் குறிப்பிட்டு, அந்தப் புரட்சி இப்போது நிஜமாகி வரலாறு படைக்கக் காத்திருக்கிறது என்று பாராட்டியுள்ளார். இத்துடன் மலேசியாவுக்கும் தமிழ்நாட்டிற்கும் இடையே பல தலைமுறைகளாகத் தொடரும் ஆழமான வரலாற்று மற்றும் கலாச்சார உறவுகளை அவர் சுட்டிக்காட்டியுள்ளார். தனது பதிவில் அவர், “எனது நண்பர் விஜய் அவர்களுக்கு மனமார்ந்த வாழ்த்துகள். வரும் காலங்களில் அவருடன் இணைந்து பணியாற்றுவதை ஆவலுடன் எதிர்பார்த்து காத்திருக்கிறேன்” என்று தெரிவித்துள்ளார்.

இதற்கு பதிலளித்துள்ள முதலமைச்சர், “மலேசியாவின் மாண்புமிகு பிரதமர் அன்வாரி இப்ராஹிம் அவர்கள் வழங்கிய அன்பான வாழ்த்துகளால் நான் மிகவும் பெருமை அடைகிறேன். உங்களின் கனிவான செயலுக்கு நன்றி. தமிழ்நாட்டிற்கும் மலேசியாவிற்கும் இடையே மேலும் சிறந்த ஒத்துழைப்பை வளர்ப்பதற்கும், நட்புறவை வலுப்படுத்துவதற்கும் நான் உறுதியுடன் இருக்கிறேன்” என்றுள்ளார்.