சியோல்: தென் கொரியாவின் தலைநகர் சியோலில் உள்ள புகழ்பெற்ற ‘ஜோக்யே’ (Jogye) விகாரையில், நாட்டின் முதலாவது ஹியூமனாய்டு ரோபோ தேரர் அறிமுகப்படுத்தப்பட்டு பௌத்த சடங்குகளில் ஈடுபடுத்தப்பட்டுள்ளது.
புத்தர் பிறந்த தினத்தை (Vesak Day) முன்னிட்டு கடந்த மே 6, 2026 அன்று இந்த விசேட ரோபோ அறிமுகம் செய்யப்பட்டது. தென் கொரியாவில் பௌத்த துறவிகளின் எண்ணிக்கை குறைவடைந்து வருவதைக் கருத்திற்கொண்டும், நவீன தொழில்நுட்பத்தின் ஊடாக இளைஞர்களை மத நடவடிக்கைகளில் ஈர்க்கும் நோக்கோடும் இந்த முயற்சி முன்னெடுக்கப்பட்டுள்ளது.
இந்த ரோபோவிற்கு ‘காபி’ (Gabi) என்ற தர்ம பெயர் சூட்டப்பட்டுள்ளது.
சுமார் 130 சென்டிமீட்டர் (4.3 அடி) உயரம் கொண்ட இந்த ரோபோ, பௌத்த துறவிகளின் பாரம்பரிய உடைகளை அணிந்து காணப்படுகிறது.
இது சீனாவைச் சேர்ந்த ‘Unitree Robotics’ நிறுவனத்தின் ‘G1’ தளத்தை அடிப்படையாகக் கொண்டு உருவாக்கப்பட்டுள்ளது.
இந்த ரோபோ பௌத்த துறவிகளுடன் இணைந்து கைகளைக் கூப்பி வணங்குதல் (வணக்கம் செலுத்துதல்), தியானப் பயிற்சிகளை மேற்கொள்ளுதல் மற்றும் சடங்குகளின் போது உரிய அசைவுகளை வெளிப்படுத்துதல் போன்ற பணிகளைச் செய்கிறது.
இது குறித்து ‘The Korea Herald’ மற்றும் ‘The Korea Times’ போன்ற சர்வதேச ஊடகங்கள் வெளியிட்டுள்ள செய்திகளின்படி, பௌத்த மதத்தின் பாரம்பரிய விழுமியங்களை அடுத்த தலைமுறைக்குக் கொண்டு செல்வதற்குத் தொழில்நுட்பத்தைப் பயன்படுத்தும் ஒரு முன்னோடித் திட்டமாக இது பார்க்கப்படுகிறது.
