Last Updated:
ராஜஸ்தான் அணி 20 ஓவர்கள் முடிவில் 6 விக்கெட் இழப்பிற்கு 228 ரன்கள் குவித்தது.
ஜெய்ப்பூரில் இன்று நடைபெற்ற விறுவிறுப்பான ஐபிஎல் 2026 லீக் ஆட்டத்தில், சன்ரைசர்ஸ் ஹைதராபாத் (SRH) அணி ராஜஸ்தான் ராயல்ஸ் (RR) அணியை 5 விக்கெட் வித்தியாசத்தில் வீழ்த்தி அபார வெற்றி பெற்றது. 229 ரன்கள் என்ற இமாலய இலக்கை துரத்திய ஹைதராபாத் அணி, இன்னும் 9 பந்துகள் மீதம் இருந்த நிலையில் இலக்கை எட்டியது.
முதலில் பேட்டிங் செய்த ராஜஸ்தான் ராயல்ஸ் அணிக்கு 15 வயது இளம் வீரர் வைபவ் சூர்யவன்ஷி மற்றும் துருவ் ஜுரெல் ஜோடி அதிரடியான அடித்தளம் அமைத்தனர். வைபவ் சூர்யவன்ஷி மைதானத்தின் நாலாபுறமும் சிக்சர்களைப் பறக்கவிட்டு, வெறும் 37 பந்துகளில் 103 ரன்கள் (5 பவுண்டரிகள், 12 சிக்ஸர்கள்) குவித்து ஆட்டமிழந்தார்.
இவருக்கு ஒத்துழைப்பு கொடுத்த துருவ் ஜுரெல் 51 ரன்கள் எடுத்தார். இறுதியில் ராஜஸ்தான் அணி 20 ஓவர்கள் முடிவில் 6 விக்கெட் இழப்பிற்கு 228 ரன்கள் குவித்தது. ஹைதராபாத் தரப்பில் ஈஷன் மலிங்கா 2 விக்கெட்டுகளை வீழ்த்தினார்.
கடினமான இலக்கை நோக்கி களம் புகுந்த ஹைதராபாத் அணிக்கு தொடக்கத்திலேயே டிராவிஸ் ஹெட் 6 ரன்னில் அவுட்டாகி ஏமாற்றம் அளித்தாலும், அபிஷேக் சர்மா மற்றும் இஷான் கிஷன் ஜோடி ஆட்டத்தின் போக்கை மாற்றியது.
இஷான் கிஷன் வெறும் 31 பந்துகளில் 74 ரன்களும் (11 பவுண்டரிகள், 3 சிக்ஸர்), அபிஷேக் சர்மா 29 பந்துகளில் 57 ரன்களும் விளாசினர். இவர்களின் அதிரடியால் ரன் வேகம் மளமளவென உயர்ந்தது. நடுவரிசையில் நிதிஷ் குமார் ரெட்டி 36 ரன்களும், ஹென்ரிச் கிளாசன் 29 ரன்களும் எடுத்து பொறுப்பான ஆட்டத்தை வெளிப்படுத்தினர்.
இறுதியில் சலில் அரோரா மற்றும் அனிகேத் வர்மா ஜோடி விக்கெட் விழாமல் பார்த்துக்கொண்டு, 5 விக்கெட் இழப்புக்கு 18.3 ஓவர்களிலேயே 229 ரன்கள் எடுத்து அணியை வெற்றிப் பாதைக்கு அழைத்துச் சென்றனர்.
ராஜஸ்தான் தரப்பில் ஜோப்ரா ஆர்ச்சர் மற்றும் பிரிஜேஷ் சர்மா தலா 2 விக்கெட்டுகளைக் கைப்பற்றினர். வைபவ் சூர்யவன்ஷியின் சதம் வீணான நிலையில், ஹைதராபாத் அணியின் கூட்டு முயற்சி அந்த அணிக்கு ஒரு முக்கியமான வெற்றியைப் பெற்றுத் தந்துள்ளது.
Apr 25, 2026 11:45 PM IST
