ஜோகூர் பாரு:
மலேசியா – சிங்கப்பூர் நில எல்லைகளில் வாகன நுழைவு அனுமதி (VEP) கட்டாயமாக்கப்பட்டதைத் தொடர்ந்து, விதிமுறைகளை மீறிய சுமார் 5,984 வெளிநாட்டு வாகனங்களுக்கு மொத்தம் 2.19 மில்லியன் ரிங்கிட் அபராதம் விதிக்கப்பட்டுள்ளதாக மலேசியப் போக்குவரத்துத் துறை (RTD) தெரிவித்துள்ளது.
கடந்த ஆண்டு ஜூலை 1-ஆம் தேதி முதல் அமலுக்கு வந்த இந்த VEP விதியின் கீழ், சுல்தான் இஸ்கந்தர் கட்டிடம் (BSI) மற்றும் சுல்தான் அபு பக்கர் வளாகம் (KSAB) ஆகிய சோதனைச் சாவடிகளில் தீவிர ஆய்வுகள் மேற்கொள்ளப்பட்டன.
ஆய்வு செய்யப்பட்ட வாகனங்கள், இதுவரை 82,987 சிங்கப்பூர் வாகனங்கள் சோதனைக்கு உட்படுத்தப்பட்டுள்ளன. அவற்றில் VEP பதிவு செய்யாத வாகனங்கள், காலாவதியான அனுமதிப் பத்திரங்களைக் கொண்ட வாகனங்கள் மற்றும் பதிவு நிலுவையில் உள்ள வாகனங்களுக்கு இந்தச் சம்மன்கள் வழங்கப்பட்டுள்ளன.
மேலும் அபராதம் விதிக்கப்பட்ட வாகன உரிமையாளர்கள், மலேசியாவை விட்டு வெளியேறுவதற்கு முன்பாக அபராதத்தைச் செலுத்தி, VEP பதிவை முடிக்க வேண்டும் என்பது கட்டாயமாக்கப்பட்டுள்ளதாக போக்குவரத்துத் துறை இயக்குநர் ஜெனரல் டத்தோ ஏடி ஃபட்லி ரம்லி (Datuk Aedy Fadly Ramli) கூறினார்.
இந்த VEP அமலாக்கம் வெறும் போக்குவரத்து விதிமுறைகளுக்காக மட்டும் அல்லாமல், நாட்டின் RON95 பெட்ரோல் மானியக் கசிவைத் தடுப்பதற்கும் முக்கியப் பங்காற்றுவதாக அவர் தெரிவித்தார்.
தானியங்கி வாகன எண் பலகை அங்கீகார (ANPR) தொழில்நுட்பம் மூலம், வெளிநாட்டு வாகனங்களின் நடமாட்டம் மற்றும் உரிமையாளர் விவரங்கள் நிகழ்நேரத்தில் (Real-time) கண்காணிக்கப்படுகின்றன. இது எரிபொருள் மானியத் துஷ்பிரயோகத்தைக் கண்டறிய அதிகாரிகளுக்குப் பெரிதும் உதவுகிறது.
கடந்த வியாழக்கிழமை வரை மொத்தம் 391,007 VEP RFID குறிச்சொற்கள் (Tags) வழங்கப்பட்டுள்ளன. இதில் 3 லட்சத்திற்கும் அதிகமான குறிச்சொற்கள் தற்போது செயல்பாட்டில் உள்ளன.
இந்தச் சோதனை நடவடிக்கைகள் வரும் காலங்களில் நாட்டின் வடக்கு எல்லைப் பகுதிகளுக்கும் விரிவுபடுத்தப்படும் என்று போக்குவரத்துத் துறை எச்சரித்துள்ளது. எனவே, வெளிநாட்டு வாகன உரிமையாளர்கள் தேவையற்ற சிக்கல்களைத் தவிர்க்க உடனடியாக VEP பதிவை மேற்கொள்ளுமாறு அறிவுறுத்தப்படுகிறார்கள்.
