ஈரானின் செறிவூட்டப்பட்ட யுரேனியம் (Enriched Uranium) அந்நாட்டை விட்டு எங்கும் மாற்றப்படாது என்று ஈரானிய வெளியுறவு அமைச்சகத்தின் செய்தித் தொடர்பாளர் இஸ்மாயில் பாகேய் திட்டவட்டமாக அறிவித்துள்ளார்.
ஊடகங்களுக்குக் கருத்து தெரிவிக்கும் போதே அவர் இதனைத் தெரிவித்துள்ளார்.
மேலும் தெரிவித்த அவர், யுரேனியத்தை அமெரிக்காவிற்கு மாற்றுவது என்பது ஒரு விருப்பமாகவே எங்களது பேச்சுவார்த்தை அட்டவணையில் இல்லை எனத் தெரிவித்துள்ளார்.
செறிவூட்டப்பட்ட யுரேனியம்
ஈரானின் செறிவூட்டப்பட்ட யுரேனியம், ஈரானின் மண்ணைப் போலவே தங்களுக்குப் புனிதமானது என்றும் அது எந்தச் சூழ்நிலையிலும் அந்நாட்டை விட்டு வெளியேற்றப்படாது என்றும் அவர் சுட்டிக்காட்டியுள்ளார்.
ஈரான் தனது செறிவூட்டப்பட்ட யுரேனியத்தை அகற்றுவது உட்பட, அமெரிக்காவின் கிட்டத்தட்ட அனைத்து நிபந்தனைகளுக்கும் ஒப்புக்கொண்டுள்ளதாக ஜனாதிபதி டொனால்ட் ட்ரம்ப் உரிமை கோரியிருந்த நிலையில் அதற்குப் பதிலடி கொடுக்கும் வகையில் இந்த அறிக்கை வெளியாகியுள்ளது.
இதன் மூலம், ஒப்பந்தம் எட்டப்பட்டுவிட்டதாக ட்ரம்ப் கூறி வரும் தகவலுக்கும் ஈரானின் அதிகாரப்பூர்வ நிலைப்பாட்டிற்கும் இடையே பாரிய முரண்பாடு நிலவுவது வெளிச்சத்திற்கு வந்துள்ளதாகச் சுட்டிக்காட்டப்பட்டுள்ளமை குறிப்பிடத்தக்கது.
செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்…! |
