Last Updated:
மேற்கு வங்கம் சட்டமன்றத் தேர்தல் 2026, சி வோட்டர் நியூஸ்18 வோட்வைப் கருத்துக்கணிப்புகள் வெளியாகியுள்ளன.
தமிழ்நாடு, புதுச்சேரி, கேரளா, மேற்கு வங்கம் மற்றும் அசாம் ஆகிய ஐந்து மாநிலங்களுக்கு இந்த மாதம் சட்டமன்றத் தேர்தல் நடைபெறுகிறது. இதில், புதுச்சேரி, கேரளா, அசாம் ஆகிய மூன்று மாநிலங்களில் நாளை வாக்குப் பதிவு நடைபெற இருக்கிறது.
தமிழ்நாட்டுக்கு ஏப்ரல் 23ஆம் தேதியும், மேற்கு வங்கத்திற்கு ஏப்ரல் 23 மற்றும் 29 ஆகிய இரண்டு தேதிகளில் இரண்டு கட்டங்களாக தேர்தல் நடைபெறுகிறது. 294 தொகுதிகள் கொண்ட மேற்கு வங்கத்தில் தற்போது மம்தா பானர்ஜி தலைமையிலான திரிணாமுல் காங்கிரஸ் ஆட்சி நடத்தி வருகிறது.
மூன்றாவது முறையாக ஆட்சியில் இருக்கும் திரிணாமுல் காங்கிரஸ் வரும் தேர்தலில் வென்று நான்காவது முறையாக ஆட்சி அமைக்க தீவிரமாக செயல்பட்டு வருகிறது. அதேபோல், மாநிலத்தில் ஆட்சியை பிடிக்க பாஜகவும் தீவிரமாக இருந்து வருகிறது.
நியூஸ்18 வோட்வைப் நடத்திய கருத்துக்கணிப்பில், திரிணாமுல் காங்கிரஸ் நான்காவது முறையாக ஆட்சி அமைக்கும் என மக்கள் தெரிவித்திருப்பதாக சொல்லப்பட்டுள்ளது. 294 தொகுதிகளில் 184 முதல் 194 தொகுதிகள் வரை வெல்லும் என்றும் பாஜக 98 முதல் 108 தொகுதிகளில் வெல்லும் எனவும் சொல்லப்பட்டுள்ளது.
48.5% பேர் மம்தா பானர்ஜியை முதலமைச்சராக தேர்வு செய்வோம் என்றும் 33.4% பேர் பாஜக தலைவர் சுவேந்து அதிகாரியை முதலமைச்சராக தேர்வு செய்வோம் எனவும் தெரிவித்துள்ளனர். மேலும், நியூஸ்18 வோட்வைப் கருத்துக்கணிப்பில், 41.9% பேர் திரிணாமுல் காங்கிரஸுக்கும் 34.9% பேர் பாஜகவுக்கும் வாக்களிப்போம் என்றும் 36.5% பேர் தற்போதைய எம்.எல்.ஏ.க்களை மீண்டும் தேர்வு செய்வோம் எனவும் தெரிவித்துள்ளனர்.
