அதிகபட்சமாக ஐந்து ஆண்டுகால ஒப்பந்தப் பணிக்காலத்தை நிறைவு செய்த மருந்தாளுநர்களுக்கு (Pharmacists), ஒப்பந்த நீட்டிப்பு வழங்கப்படாது என்று சுகாதார அமைச்சு தெளிவுபடுத்தியுள்ளது.
“பணி முடிவடைவதால் 45 ஒப்பந்த மருந்தாளுநர்கள் தவிப்பு” என்ற செய்தி தொடர்பாக எழுப்பப்பட்ட கவலைகளைத் தாங்கள் கவனித்துள்ளதாக அமைச்சு கூறியுள்ளதாக வட்டாரங்கள் தெரிவித்துள்ளது.
இன்று வெளியிட்ட அறிக்கையில், பாதிக்கப்பட்ட அதிகாரிகள் 2027-ஆம் ஆண்டின் இறுதியில் நிரந்தரப் பணியிடங்கள் திறக்கப்படும்போது மீண்டும் விண்ணப்பிக்கலாம் என்று அமைச்சு தெரிவித்துள்ளது.
டிசம்பர் 1, 2024 முதல் நடைமுறைக்கு வந்த பொதுச் சேவை ஊதிய முறைமையின் அமலாக்கத்திற்கு ஏற்ப, அவர்கள் முன்னதாக UF43 என அறியப்பட்ட புதிய நுழைவு நிலை தரம் UF10-இன் கீழ் பணியமர்த்தப்படுவார்கள்.
“இந்த மூலோபாய மறுசீரமைப்பு, தேசிய சுகாதார மனிதவள அமைப்பை நீண்ட காலத்திற்கு அதிக சமமானதாகவும், வெளிப்படையானதாகவும் மற்றும் போட்டித்தன்மை வாய்ந்ததாகவும் வலுப்படுத்துவதற்கான ஒரு முக்கியமான நடவடிக்கையாகும்” என்று அந்த அறிக்கையில் கூறப்பட்டுள்ளது.
நிரந்தரப் பணிக்கான எந்தவொரு சலுகையும் நிபந்தனைக்கு உட்பட்டது என்று அமைச்சு தெரிவித்துள்ளது.
“மருத்துவப் பரிசோதனைத் தேர்ச்சி, சட்டப்பூர்வ உறுதிமொழிகள் மற்றும் உறுதிப்படுத்தப்பட்ட காலியிடங்கள் உள்ளிட்ட அனைத்து நிபந்தனைகளையும் விண்ணப்பதாரர்கள் பூர்த்தி செய்த பின்னரே, பணி நியமனம் மற்றும் இடமாற்றக் கடிதங்கள் வழங்கப்படும்,” என்று அது கூறியது.
தொடர்புடைய அதிகாரிகளில் சிலர் காத்திருப்புப் பட்டியலில் உள்ளவர்களும் இருக்கிறார்கள் என்பதையும் அது சுட்டிக்காட்டியது. எனவே, அவர்கள் தற்போதைய காலியிடங்களின் அடிப்படையில் தங்கள் பணிக்கான வாய்ப்பு வரும் வரை காத்திருக்க வேண்டும்.
கடந்த அக்டோபரில் நிரந்தரப் பணியிடங்கள் வழங்கப்பட்ட போதிலும், கடந்த சனிக்கிழமைக்குள் பணி நியமனக் கடிதங்களைப் பெறத் தவறியதால், 45 அனுபவம் வாய்ந்த ஒப்பந்த மருந்தாளுநர்கள் தங்கள் அரசுப் பணிகளை இழப்பார்கள் என்று வட்டாரங்கள் முன்னதாகத் தெரிவித்திருந்தது.
குறைந்தது ஐந்து ஆண்டுகள் ஒப்பந்த அதிகாரிகளாகப் பணியாற்றிய இந்தக் குழுவைத் தவிர, சுகாதார அமைச்சு நிரந்தரப் பணியிடங்களை வழங்காவிட்டால் மேலும் 40 பேர் ஜூலை மாதத்தில் தங்கள் வேலையை இழப்பார்கள்.
அக்டோபர் மாதம் நாடாளுமன்ற மேலவையில் இந்த விவகாரத்தை எழுப்பிய முன்னாள் செனட்டர் டாக்டர் ஆர்.ஏ. லிங்கேஸ்வரன் கூறுகையில், நிரந்தரப் பணியிடங்கள் வழங்கப்பட்டு, தேதிகள் குறிப்பிடப்படாமல் பணி நியமனக் கடிதங்களுக்காகக் காத்திருக்குமாறு கூறப்பட்ட 352 ஒப்பந்த மருந்தாளுநர்களில் இவர்களும் அடங்குவர் என்றார்.
சுகாதார அமைச்சு 352 ஒப்பந்த மருந்தாளுநர்களை நிரந்தரப் பணியிடங்களுக்கான காத்திருப்புப் பட்டியலில் வைத்திருந்தது.
“இவர்களில், 143 மருந்தாளுநர்கள் மட்டுமே இன்னும் பணியில் உள்ளனர், 209 பேர் பல்வேறு காரணங்களுக்காக விலகிவிட்டனர். காலதாமதம் மற்றும் நிச்சயமற்ற எதிர்காலம் காரணமாகவே தாங்கள் விலகியதாகச் சிலர் என்னிடம் தெரிவித்தனர்,” என்று லிங்கேஸ்வரன் மேலும் கூறினார்.
-fmt
