ரியாத் | மார்ச் 22, 2026
மத்திய கிழக்கில் போர் மேகங்கள் சூழ்ந்துள்ள நிலையில், சவூதி அரேபியாவுக்கும் ஈரானுக்கும் இடையிலான உறவில் பெரும் விரிசல் ஏற்பட்டுள்ளது. சவூதி அரேபியாவில் பணியாற்றி வரும் ஈரானிய தூதரக அதிகாரிகள் மற்றும் ஊழியர்கள் அடுத்த 24 மணி நேரத்திற்குள் நாட்டை விட்டு வெளியேற வேண்டும் என்று சவூதி வெளியுறவு அமைச்சகம் அதிரடி உத்தரவு பிறப்பித்துள்ளது.
கடந்த சில வாரங்களாக ஈரான் தரப்பிலிருந்து சவூதி அரேபியாவின் முக்கிய நகரங்களை இலக்கு வைத்து ஏவுகணை மற்றும் ட்ரோன் (Drone) தாக்குதல்கள் நடத்தப்பட்டு வருகின்றன. குறிப்பாக, ரியாத் நகருக்கு அருகில் சவூதி வான் பாதுகாப்புப் படையினரால் இடைமறித்து அழிக்கப்பட்ட ஏவுகணைத் தாக்குதலே இந்த அதிரடி முடிவுக்கு முக்கிய காரணமாகக் கருதப்படுகிறது.
சவூதி வெளியுறவு அமைச்சகம் வெளியிட்டுள்ள அறிக்கையின்படி, ஈரானிய தூதரகத்தின் இராணுவ அட்டாஷே (Military Attaché), அவரது உதவியாளர் மற்றும் மூன்று முக்கிய தூதரக ஊழியர்கள் என இவர்கள் அனைவரும் “Persona non grata” (வரவேற்கப்படாத நபர்கள்) என அறிவிக்கப்பட்டுள்ளனர்.
இது குறித்து சவூதி வெளியுறவு அமைச்சர் இளவரசர் ஃபைசல் பின் ஃபர்ஹான் கூறுகையில், “ஈரான் தனது அண்டை நாடுகளின் இறையாண்மையை மதிக்காமல் தொடர்ந்து அச்சுறுத்தல் விடுத்து வருகிறது. 2023-ல் மேற்கொள்ளப்பட்ட பெய்ஜிங் அமைதி ஒப்பந்தத்தை ஈரான் முழுமையாக மீறிவிட்டது. எமது நாட்டின் பாதுகாப்பை உறுதி செய்ய வேண்டிய கட்டாயத்தில் இந்த முடிவை எடுத்துள்ளோம்” எனத் தெரிவித்துள்ளார்.
ஏற்கனவே கத்தார் நாடு ஈரானிய அதிகாரிகளை வெளியேற்றிய நிலையில், இப்போது சவூதியும் இதே போன்ற நடவடிக்கையை எடுத்துள்ளது மத்திய கிழக்கு பிராந்தியத்தில் பெரும் பதற்றத்தை உருவாக்கியுள்ளது. ஹார்முஸ் ஜலசந்தி (Strait of Hormuz) வழியாக நடைபெறும் கச்சா எண்ணெய் போக்குவரத்து இதனால் பாதிக்கப்படலாம் என அஞ்சப்படுகிறது.
தற்போது ஈரானிய தூதரக அதிகாரிகள் தங்களது ஆவணங்களைச் சேகரித்துக்கொண்டு வெளியேறுவதற்கான ஆயத்தப் பணிகளில் ஈடுபட்டுள்ளதாகத் தகவல்கள் தெரிவிக்கின்றன.
