மூன்று நாட்களாக நடைபெற்ற 147 ஆவது, ரோயல் – புனித தோமஸ் கல்லூரிகளுக்கு இடையிலான வரலாற்று சிறப்புமிக்க கிரிக்கெட் போட்டி (Big Match) எவ்வித முடிவுகளுமின்றி சமநிலையில் (Draw) முடிவடைந்தது.
மூன்று நாட்களில் வீசப்பட்ட 266 ஓவர்களில் இரு அணிகளும் இணைந்து 739 ஓட்டங்களை மாத்திரமே பெற்றிருந்தன. ஆட்டத்தில் விறுவிறுப்பு குறைவாக இருந்த போதிலும், புனித தோமஸ் கல்லூரியின் ஆரம்பத் துடுப்பாட்ட வீரர் ஜேடன் அமரவீரவின் துடுப்பாட்டம் ஆட்டத்தின் சிறப்பம்சமாக அமைந்தது.
கொழும்பு எஸ்.எஸ்.சி (SSC) மைதானத்தில் நடைபெற்ற இந்த போட்டியின் இறுதி நாளான சனிக்கிழமை (14), அன்று ஆட்டம் நிறுத்தப்படும் போது புனித தோமஸ் அணி தனது இரண்டாவது இன்னிங்ஸிற்காக 6 விக்கெட்டுகளை இழந்து 176 ஓட்டங்களை பெற்றிருந்தது. ஆரம்பம் முதலே நிதானமாக விளையாடிய ஜேடன் அமரவீர, 225 நிமிடங்கள் களத்தில் நின்று தனது அபார சதத்தைப் பூர்த்தி செய்தார். அவர் சதம் அடித்தவுடன் ஆட்டத்தை சமநிலையில் முடிக்க இரு அணிகளும் தீர்மானித்தன.
மற்றைய முனையில் விக்கெட்டுகள் சீரான இடைவெளியில் வீழ்ந்த போதிலும், மன உறுதியுடன் விளையாடிய அமரவீர 162 பந்துகளில் 9 பவுண்டரிகள் மற்றும் 3 சிக்ஸர்களுடன் 100 ஓட்டங்களைக் குவித்தார்.
இலங்கையின் வேகமான ஆடுகளங்களில் ஒன்றான SSC மைதானத்தில், இரு அணிகளினதும் ஓட்ட விகிதம் ஓவருக்கு 2.78 ஆக மட்டுமே இருந்தது. புனித தோமஸ் அணி தனது முதல் இன்னிங்ஸில் மிகவும் மெதுவாக விளையாடியதே போட்டி சமநிலையில் முடிய முக்கிய காரணமாக அமைந்தது. ரோயல் கல்லூரியும் தனது முதல் இன்னிங்ஸில் 261 ஓட்டங்களைப் பெற 86 ஓவர்களை எடுத்துக்கொண்டது.
- ஆட்ட நாயகன் மற்றும் சிறந்த துடுப்பாட்ட வீரர்: ஜேடன் அமரவீர (இரு இன்னிங்ஸ்களிலும் சேர்த்து 152 ஓட்டங்கள்).
- சிறந்த பந்துவீச்சாளர்: ககன் கமகெ.
- சிறந்த களத்தடுப்பாளர்: உதந்த கணேவத்த.
போட்டி சமநிலையில் முடிந்ததால், வெற்றியாளர்களுக்கு வழங்கப்படும் டி.எஸ். சேனநாயக்க நினைவுச் கேடயத்தை (D.S. Senanayake Memorial Shield), டயலொக் ஆசியாட்டா நிறுவனத்தின் குழும பணிப்பாளரும் முதன்மை நிறைவேற்று அதிகாரியுமான சுபுன் வீரசிங்க, இரு அணிகளின் தலைவர்களான அவினாஷ் பெர்னாண்டோ மற்றும் ரெஹான் பீரிஸ் ஆகியோரிடம் வழங்கி வைத்தார்.
சுருக்கமான ஸ்கோர் விபரம்:
- புனித தோமஸ் கல்லூரி (முதல் இன்னிங்ஸ்): 302/10 (ரொஷேன் சொலமன் 66, ஜேடன் அமரவீர 52, அவினாஷ் பெர்னாண்டோ 50; ககன் கமகெ 49/4)
- ரோயல் கல்லூரி (முதல் இன்னிங்ஸ்): 261/9 (ருமிரு பெரேரா 82, ரெஹான் பீரிஸ் 63; கிம்ஹான் மெண்டிஸ் 60/4)
- புனித தோமஸ் கல்லூரி (இரண்டாவது இன்னிங்ஸ்): 176/6 (ஜேடன் அமரவீர 100*)
