கடைசி ஓவர் வரை நீடித்த பரபரப்பான ஆட்டம்.. இங்கிலாந்தை வென்று இறுதிப் போட்டிக்கு முன்னேறியது இந்திய அணி | கிரிக்கெட் செய்திகள்

இந்த போட்டியில் முதலில் பேட்டிங் செய்த இந்திய அணி 20 ஓவர்கள் முடிவில் 7 விக்கெட் இழப்புக்கு 253 ரன்கள் எடுத்தது. அதிகபட்சமாக சஞ்சு சாம்சன் 42 பந்துகளில் 7 சிக்சர் 8 பவுண்டரியுடன் 89 ரன்கள் குவித்தார். சிவம் துபே 43 ரன்களும், இஷான் கிஷன் 39 ரன்களும் எடுத்தனர்.

கடைசி ஓவர்களில் அதிரடியாக விளையாடிய ஹர்திக் பாண்ட்யா 12 பந்துகளில் 27 ரன்களும், திலக் வர்மா 7 பந்துகளில் 21 ரன்களும் எடுத்தனர். இங்கிலாந்து தரப்பில் வில் ஜாக்ஸ் மற்றும் ஆடில் ரஷித் தலா 2 விக்கெட்டுகளை கைப்பற்றினர்.

இதையடுத்து 254 ரன்கள் எடுத்தால் வெற்றி என்ற இமாலய இலக்கை நோக்கி இங்கிலாந்து அணி விளையாடத் தொடங்கியது. அந்த அணியின் தொடக்க வீரர் பிலிப் சால்ட் 5 ரன்களிலும், கேப்டன் ஹேரி ப்ரூக் 7 ரன்களிலும் ஆட்டமிழந்தனர்.

அடுத்து வந்த டாம் பான்டன் 17 ரன்களில் வெளியேறினார். 4 விக்கெட் இழப்புக்கு இங்கிலாந்து அணி 95 ரன்கள் என்ற நிலையில் இருந்தபோது இணைந்த வில் ஜாக்ஸ் – பெத்தேல் இணை பொறுப்புடன் விளையாடி ரன்கள் சேர்த்தது. இருவரும் 5 ஆவது விக்கெட்டிற்கு 79 ரன்கள் பார்ட்னர்ஷிப் அமைத்தனர்.

வில் ஜாக்ஸ் 35 ரன்கள் எடுத்து ஆட்டமிழந்தார். விக்கெட்டுகள் ஒருபக்கம் விழுந்தாலும் மறுமுனையில் ஜேக்கப் பெத்தேல் அதிரடியாக ரன்கள் சேர்த்து சதம் அடித்து அணிக்கு நம்பிக்கை அளித்தார்.

இங்கிலாந்து அணி 19 ஓவர்களில் 6 விக்கெட் இழப்புக்கு 224 ரன்கள் எடுத்திருந்தது. கடைசி ஓவரில் வெற்றி பெற 30 ரன்கள் தேவைப்பட்டபோது முதல் பந்திலேயே ஜேக்கப் பெத்தேல் 105 ரன்கள் எடுத்திருந்தபோது ரன் அவுட் முறையில் ஆட்டமிழந்தார்.

20 ஓவர்கள் முடிவில் 7 விக்கெட்டுகளை இழந்த இங்கிலாந்து அணி 246 ரன்கள் எடுத்து 7 ரன்கள் வித்தியாசத்தில் தோல்வியடைந்தது. இந்த வெற்றியின் மூலம் இறுதிப் போட்டிக்கு முன்னேறியுள்ள இந்திய அணி வரும் ஞாயிறு அன்று அகமதாபாத்தில் நடைபெறும் போட்டியில் நியூசிலாந்தை எதிர்கொள்கிறது.