இலங்கையில் மூன்று பிரபல நடிகைகளை துரத்தும் சிஐடி…!

ஓய்வுபெற்ற இராணுவத்தினரைக் குறிவைத்து ஆள் கடத்தலின் மூளையாக அடையாளம் காணப்பட்ட சதுரங்க என்ற நபரின் வெளிநாட்டு வேலைவாய்ப்பு நிறுவனத்தை விளம்பரப்படுத்துவதில் ஈடுபட்ட பிரபல இளம் நடிகைகள் பலரிடம் விசாரணை நடத்த குற்றப் புலனாய்வுத் திணைக்களம்(cid) தயாராக உள்ளது.

கண்டி(kandy), கட்டுகஸ்தோட்டை வீதியில் அமைந்துள்ள கட்டடமொன்றில் சதுரங்க(Chaturanga) என்ற நபரால் வெளிநாட்டு வேலைவாய்ப்பு நிறுவனம் நடத்தப்பட்டு வந்ததாக தெரியவந்துள்ளது.

அந்த வெளிநாட்டு வேலைவாய்ப்பு நிறுவனத்தை விளம்பரப்படுத்த இளம் பிரபல நடிகைகளை அவர் பயன்படுத்திக் கொண்டதுடன், சமூக வலைத்தளங்கள் மூலம் பெரும் விளம்பரமும் செய்துள்ளதாக விசாரணைகளில் தெரியவந்துள்ளது.

ஓய்வு பெற்ற ராணுவ வீரர்கள் கூலிப்படையாக ரஷ்யாவுக்கு

ஐரோப்பிய நாடுகளின் பயணங்கள், கல்வி விசா போன்றவற்றுக்காக இந்த நிறுவனம் நடத்தப்பட்டாலும், ஓய்வு பெற்ற ராணுவ வீரர்களை கூலிப்படையாக ரஷ்யாவுக்கு கடத்துவதில் முதன்மையாக செயற்பட்டவர் இவரே என்பது விசாரணையில் தெரியவந்துள்ளது.

தற்போது அவர் போலந்தில் தங்கியிருப்பதாக தெரிவிக்கப்படுகிறது. ரஷ்யாவில் தங்கியிருப்பதாக கூறி அவர் இந்த பிரசாரத்தை மேற்கொண்டுள்ளது கண்டுபிடிக்கப்பட்டுள்ளது.

இலங்கையில் உள்ள பல தொலைக்காட்சிகளில்

சதுரங்க என்ற இந்த நபர் பல வெளிநாட்டு இளம் நடிகைகள் உட்பட பெருமளவிலான யுவதிகளை தொடர்பு கொண்டுள்ளமையும் தெரியவந்துள்ளது.

இலங்கையில் உள்ள பல தொலைக்காட்சிகளில் பல பிரபலமான டெலி நாடகங்களில் நடித்து பங்களிக்கும் மூன்று நடிகைகள் இவரின் விளம்பரத்திற்கு பங்களித்துள்ளதாக கூறப்படுகிறது.