கோலாலம்பூர், பிப்ரவரி 26, 2026:
கோலாலம்பூர், ஜாலான் கெந்திங் கிள்ளான் (Jalan Genting Kelang) பகுதியில் உள்ள ஒரு கட்டிடத்தில் ஜன்னல்களை அப்புறப்படுத்தும் பணியில் ஈடுபட்டிருந்த 44 வயது பாகிஸ்தான் நபர், கண்ணாடி உடைந்து விழுந்ததில் ஏற்பட்ட பலத்த காயத்தால் உயிரிழந்தார்.
நேற்று மாலை 4.44 மணியளவில் விஸ்மா கெந்திங் (Wisma Genting) கட்டிடத்தில் இந்த விபத்து நடந்ததாக போலீசாருக்குத் தகவல் கிடைத்தது என்று, வாங்சா மாஜு மாவட்ட போலீஸ் தலைவர் அசிஸ்டண்ட் கமிஷனர் முகமட் லாசிம் இஸ்மாயில் கூறினார்.
உயிரிழந்த நபர் கட்டிடத்தின் மேல் தளத்திலிருந்து பழைய அலுவலக ஜன்னல்களைக் கீழே இருந்த குப்பைத் தொட்டியில் அப்புறப்படுத்தும் பணியில் ஈடுபட்டிருந்தார்.
அப்போது எதிர்பாராத விதமாக ஜன்னல் கண்ணாடி உடைந்து சிதறி அந்த நபரின் கையில் பாய்ந்தது. இதில் அவருக்கு மிகக் கடுமையான ரத்தப்போக்கு ஏற்பட்டது.
சம்பவ இடத்திற்கு விரைந்து வந்த மருத்துவக் குழுவினர், அந்த நபர் ஏற்கனவே உயிரிழந்துவிட்டதை உறுதி செய்தனர்.
உயிரிழந்தவரின் உடல் பிரேதப் பரிசோதனைக்காகக் கோலாலம்பூர் மருத்துவமனையின் (HKL) தடயவியல் பிரிவுக்கு அனுப்பி வைக்கப்பட்டுள்ளது. இந்தச் சம்பவம் ‘திடீர் மரணம்’ (Sudden Death) என வகைப்படுத்தப்பட்டு போலீசார் விசாரணை நடத்தி வருகின்றனர்.
