ரஷ்ய எதிர்க்கட்சித் தலைவர் அலெக்ஸி நவால்னியின் மரணம் தொடர்பாக பிரிட்டன் மற்றும் ஐரோப்பிய கூட்டாளிகள் கடுமையான குற்றச்சாட்டை முன்வைத்துள்ளனர். சைபீரிய சிறை முகாமில் உயிரிழந்த நவால்னி, டார்ட் தவளையில் இருந்து பெறப்படும் எபிபாட்டிடின் (Epibatidine) என்ற விஷத்தை பயன்படுத்தி கொல்லப்பட்டதாக அவர்கள் தெரிவித்துள்ளனர்.
நவால்னி உயிரிழந்ததற்கு இரண்டு ஆண்டுகள் நிறைவடைந்துள்ள நிலையில், அவரது உடலில் இருந்து பெறப்பட்ட மாதிரிகளை ஆய்வு செய்தபின் இந்த முடிவு எடுக்கப்பட்டதாக கூறப்படுகிறது. மியூனிக் பாதுகாப்பு மாநாட்டில் பேசிய பிரிட்டன் வெளிவிவகார செயலர் யிவெட் கூப்பர், “இந்த விஷத்தை பயன்படுத்த தேவையான திறன், நோக்கம் மற்றும் வாய்ப்பு ரஷ்ய அரசுக்கே இருந்தது” என்று தெரிவித்துள்ளார்.
இதற்கிடையில், மாஸ்கோ இந்த குற்றச்சாட்டை “தகவல் பிரசாரம்” என நிராகரித்ததாக Tass செய்தி நிறுவனம் தெரிவித்துள்ளது. எனினும், நவால்னியின் உடலில் எபிபாட்டிடின் இருப்பதற்கான நியாயமான விளக்கம் எதுவும் இல்லை என்று கூப்பர் வலியுறுத்தினார்.
இந்த விவகாரம் குறித்து பிரிட்டன், ஸ்வீடன், பிரான்ஸ், ஜெர்மனி மற்றும் நெதர்லாந்து ஆகிய நாடுகள் இணைந்து கூட்டு அறிக்கையும் வெளியிட்டுள்ளன. அதில், “சைபீரிய சிறையில் இருந்தபோது இந்த கொல்லும் விஷத்தை பயன்படுத்துவதற்கான திறன், நோக்கம் மற்றும் வாய்ப்பு ரஷ்ய அரசுக்கே இருந்தது; எனவே நவால்னியின் மரணத்திற்கு ரஷ்யாவே பொறுப்பு” என்று குறிப்பிடப்பட்டுள்ளது.
மேலும், எபிபாட்டிடின் இயற்கையாக தென் அமெரிக்காவின் டார்ட் தவளைகளில் காணப்படும் விஷமாகும்; இது ரஷ்யாவில் இயல்பாக காணப்படாது என்றும் கூட்டாளிகள் தெரிவித்தனர். இந்த விஷம் நவால்னியின் உடலில் கண்டுபிடிக்கப்பட்டதற்கு நியாயமான காரணம் எதுவும் இல்லை என்றும் அவர்கள் கூறினர்.
இந்நிலையில், ரசாயன ஆயுத ஒப்பந்தத்தை ரஷ்யா மீறியிருக்கலாம் என்ற சந்தேகத்தின் அடிப்படையில், இந்த விவகாரத்தை ரசாயன ஆயுதத் தடை அமைப்பிற்கு (OPCW) பிரிட்டன் அறிவித்துள்ளதாக வெளிவிவகார அலுவலகம் தெரிவித்துள்ளது.
நவால்னியின் துணிச்சலை பாராட்டிய பிரிட்டன் பிரதமர் கியர் ஸ்டார்மர், உண்மையை வெளிக்கொணர அவர் காட்டிய உறுதி நீண்டநாள் மரபை விட்டுச் சென்றுள்ளது என்றார். ரஷ்யா மற்றும் அதிபர் புடின் ஏற்படுத்தும் அச்சுறுத்தலிலிருந்து மக்களையும் மதிப்புகளையும் பாதுகாக்க தேவையான அனைத்தையும் மேற்கொள்வேன் என்றும் அவர் தெரிவித்தார்.
