Last Updated:
இந்தக் கூட்டணி, தேர்தல் முடிவுகளில் ஒரு பெரும் திருப்புமுனையை ஏற்படுத்தும் என்று அரசியல் விமர்சகர்கள் எதிர்பார்க்கின்றனர்.
அண்டை நாடான வங்கதேசத்தில், கடந்த 2024-ஆம் ஆண்டு மாணவர்களின் போராட்டத்தால் ஷேக் ஹசீனாவின் ஆட்சி கவிழ்ந்தது. இதனைத் தொடர்ந்து, முகமது யூனிஸ் தலைமையில் இடைக்கால அரசு அமைக்கப்பட்டது.
இந்நிலையில் ஜனநாயக முறைப்படி தேர்தல் நடத்தப்படும் என அறிவிக்கப்பட்டு, 300 தொகுதிகளுக்கு இன்று வாக்குப்பதிவு விறுவிறுப்பாக நடைபெற்று வருகிறது. இதில், அண்மையில் மறைந்த முன்னாள் பிரதமர் கலீதா ஜியாவின் மகன் தாரிக் ரஹ்மான் தலைமையிலான வங்கதேச தேசியவாத கட்சி (BNP) அடங்கிய கூட்டணிக்கும், ஜமாத்-இ-இஸ்லாமி தலைமையிலான கூட்டணிக்கும் இடையே நேரடி போட்டி நிலவுகிறது.
வங்கதேசத்தில் இன்று (பிப்ரவரி 12, 2026) மிக முக்கியமான நாடாளுமன்றத் தேர்தல் நடைபெற்று வரும் சூழலில், அரசியல் களத்தில் ’11-கட்சி கூட்டணி’ (11-Party Alliance) ஒரு புதிய அதிகார மையமாக உருவெடுத்துள்ளது.
நீண்ட இடைவெளிக்குப் பிறகு மீண்டும் அரசியலில் களம் இறங்கியுள்ள ஜமாத்-இ-இஸ்லாமி கட்சியின் தலைவர் ஷஃபிகுர் ரஹ்மான் தலைமையில் இந்தக் கூட்டணி உருவாக்கப்பட்டுள்ளது. இதில் 2024 புரட்சியில் முக்கியப் பங்காற்றிய மாணவர் தலைவர்களின் தேசிய குடிமக்கள் கட்சி (NCP) இணைந்திருப்பது மிகப்பெரிய பலமாகக் கருதப்படுகிறது.
பாரம்பரியமாக ஆதிக்கம் செலுத்தி வந்த அவாமி லீக் கட்சி இத்தேர்தலில் பங்கேற்காத நிலையில், இந்தக் கூட்டணி தற்போது வங்கதேச தேசியவாத கட்சிக்கு (BNP) ஒரு வலுவான மாற்றாகவும், நாட்டின் ‘மூன்றாவது சக்தியாகவும்’ தன்னை முன்னிறுத்துகிறது.
சுமார் 12.7 கோடி வாக்காளர்கள் பங்கேற்கும் இந்தத் தேர்தலில், இந்த 11-கட்சி கூட்டணி பெரும்பான்மையான தொகுதிகளில் போட்டியிடுகிறது. குறிப்பாக ஜமாத் கட்சி மட்டும் 179 இடங்களில் நேரடியாகக் களம் காண்கிறது.
நாடாளுமன்றத் தேர்தலுடன் சேர்த்து அரசியலமைப்பு மாற்றங்களுக்கான பொது வாக்கெடுப்பும் இன்று நடைபெறுவதால், இது வங்கதேசத்தின் எதிர்காலத்தைத் தீர்மானிக்கும் ஒரு வரலாற்றுச் சிறப்புமிக்க நாளாகப் பார்க்கப்படுகிறது. இளம் தலைமுறையினரின் ஆதரவைப் பெற்றுள்ள இந்தக் கூட்டணி, தேர்தல் முடிவுகளில் ஒரு பெரும் திருப்புமுனையை ஏற்படுத்தும் என்று அரசியல் விமர்சகர்கள் எதிர்பார்க்கின்றனர்.
Click here to add News18 as your preferred news source on Google. 
