World Cup T20 : ஓமனை சிதறடித்த இலங்கை அணி.. 105 ரன்கள் வித்தியாசத்தில் அபார வெற்றி | கிரிக்கெட் செய்திகள்

இந்த போட்டியில் டாஸ் வென்ற ஓமன் அணி பவுலிங் தேர்வு செய்தது. இதை அடுத்து இலங்கை அணியின் தொடக்க வீரர்களாக களம் இறங்கிய பதும் நிசாங்கா 13 ரன்களும், கமில் மிசோரா 8 ரன்களும் எடுத்து ஆட்டம் இழந்தனர். அடுத்து இணைந்த விக்கெட் கீப்பர் குசால் மெண்டிஸ் மற்றும் பவன் ரத்னாயகே இணை சிறப்பாக விளையாடி ரன்களை சேர்த்தது.

இருவரும் மூன்றாவது விக்கெட்டுக்கு 94 ரன்கள் பார்ட்னர்ஷிப் அமைத்தனர். குசால் மெண்டிஸ் 61 ரன்களும், பவன் ரத்னாயகே 60 ரன்களும் எடுத்து ஆட்டம் இழந்தனர். கேப்டன் தசுன் ஷனாக அதிரடியாக விளையாடி 20 பந்துகளில் 50 ரன்கள் எடுத்தார்.

20 ஓவர் முடிவில் 5 விக்கெட்டுகளை இழந்த இலங்கை அணி 225 ரன்கள் குவித்தது. இதை அடுத்து 226 ரன்கள் எடுத்தால் வெற்றி என்ற கடினமான இலக்கை நோக்கி ஓமன் அணி வீரர்கள் களம் இறங்கினர். அவர்களில் முகமது நதீம் மட்டும் 53 ரன்கள் சேர்த்தார். மற்றொரு வீரர் வாசிம் அலி 27 ரன்கள் எடுத்து ஆட்டம் இழந்தார்.

மற்ற அனைத்து வீரர்களும் ஒற்றை இலக்கத்தில் ஆட்டம் இழந்து வெளியேறினர். 20 ஓவர்கள் முடிவில் 9 விக்கெட்களை இழந்த ஓமன் அணி 120 ரன்கள் மட்டுமே எடுத்து 105 ரன்கள் வித்தியாசத்தில் தோல்வியடைந்துள்ளது.