‘மன்னா’ ஹெல்த் மிக்ஸ் நிறுவனத்தை வாங்கியது ரிலையன்ஸ்… இந்தியா முழுவதும் கொண்டு செல்ல திட்டம்! | வணிகச் செய்திகள்

இது தொடர்பாக ரிலையன்ஸ் வெளியிட்டுள்ள அறிவிப்பில் கூறப்பட்டுள்ளதாவது- கடந்த இருபது ஆண்டுகளுக்கும் மேலாக ஆரோக்கிய உணவுகள் சந்தையில் புகழ்பெற்ற ‘மன்னா’ (Manna) பிராண்ட் இனி ரிலையன்ஸ் நிறுவனத்தின் ஒரு அங்கமாகச் செயல்படும்.

ரிலையன்ஸ் நிறுவனத்தின் FMCG பிரிவான RCPL, ஏற்கனவே உதயம், இன்டிபென்டன்ஸ் மற்றும் சில் (SiL) போன்ற பிராண்டுகளைக் கொண்டுள்ள நிலையில், தற்போது மன்னா பிராண்டையும் தனது உணவுப் பட்டியலில் இணைத்துள்ளது.

மன்னா நிறுவனம், சிறுதானியங்கள் (Millets), ஓட்ஸ், மல்டிகிரைன் தயாரிப்புகள், ஹெல்த் மிக்ஸ், காலை உணவு வகைகள் மற்றும் குழந்தைகளுக்கான சத்தான உணவுகள் போன்ற பிரிவுகளில் தமிழகம் மற்றும் அதன் அண்டை மாநிலங்களில் பெரும் வரவேற்பைப் பெற்றுள்ளது.

குறிப்பாக, ‘மன்னா’ பிராண்டின் சிறுதானிய மாவுகள் மற்றும் மல்டிகிரைன் பானங்கள் மிகவும் பிரபலமானவை. இந்த கையகப்படுத்துதலின் மூலம், வேகமாக வளர்ந்து வரும் சிறுதானிய உணவுச் சந்தையில் ரிலையன்ஸ் நிறுவனம் ஒரு வலுவான இடத்தைப் பிடிக்கத் திட்டமிட்டுள்ளது.

ரிலையன்ஸ் நிறுவனத்தின் இயக்குநர் டி. கிருஷ்ணகுமார் இதுகுறித்துக் கூறுகையில், தமிழகத்தில் மிகவும் நம்பிக்கைக்குரிய பிராண்டாக விளங்கும் மன்னாவை, ரிலையன்ஸ் நிறுவனத்தின் வலுவான விநியோகக் கட்டமைப்பு மற்றும் ஆராய்ச்சி வசதிகள் மூலம் இந்தியா முழுவதும் உள்ள ஒவ்வொரு வீட்டிற்கும் கொண்டு செல்லப்போவதாகத் தெரிவித்தார்.