கோலாலம்பூர்:
சரவாக் மாநிலம் மலேசியாவிலிருந்து பிரிய வேண்டும் எனத் தாம் கூறவில்லை என்றும், தனது கருத்துக்கள் தவறாகப் புரிந்து கொள்ளப்பட்டதாகவும் மலேசியப் பொதுப் பணித்துறை அமைச்சரும், ஜிபிஎஸ் (GPS) கூட்டணியின் பொதுச் செயலாளருமான டத்தோ ஸ்ரீ அலெக்சாண்டர் நந்தா லிங்கி தெளிவுபடுத்தியுள்ளார். சமீபத்தில் பி.எஃப்.எம் (BFM) வானொலிக்கு அளித்த நேர்காணலில், தீபகற்ப மலேசியாவில் நிலவும் முடிவற்ற அரசியல் மோதல்கள் குறித்து அவர் தனது அதிருப்தியை வெளிப்படுத்தியிருந்தார். அப்போது அவர் குறிப்பிட்ட சில வார்த்தைகள், சரவாக் பிரிந்து செல்ல விரும்புவதாகச் சமூக ஊடகங்களில் விவாதங்களைக் கிளப்பியது.
அந்த நேர்காணலின் போது உணர்ச்சிவசப்பட்ட நிலையில் பேசிய நந்தா லிங்கி, “அரசியல் சச்சரவுகளிலேயே நாம் தொடர்ந்து கவனம் செலுத்தினால், சரவாக் மக்கள் மீது குற்றம் சொல்லாதீர்கள்; எங்களை உங்களுக்குப் பிடிக்கவில்லை என்றால் எங்களை விட்டுவிடுங்கள்” என்று குறிப்பிட்டிருந்தார். நாட்டின் வளர்ச்சி பாதிக்கப்படுவதைக் கண்டு ஏற்பட்ட விரக்தியிலேயே அவ்வாறு பேசியதாகக் குறிப்பிட்ட அவர், மலேசியர்கள் அனைவரும் ஒற்றுமையாக வாழ வேண்டும் என்பதை வலியுறுத்துவதே தனது உண்மையான நோக்கம் என்று தற்போது தெரிவித்துள்ளார்.
சரவாக் மக்கள் நாட்டின் பொருளாதார மேம்பாட்டிலும், அமைதியான முன்னேற்றத்திலும் அதிக அக்கறை கொண்டுள்ளதைச் சுட்டிக்காட்டிய அமைச்சர், பிரிவினைவாத எண்ணம் தமக்கு இல்லை என்று திட்டவட்டமாகக் கூறியுள்ளார். மலேசியாவின் ஒற்றுமையைக் கட்டிக்காப்பதிலும், நாட்டின் எதிர்காலத்தை வலுப்படுத்துவதிலுமே தற்போதைய கவனம் இருக்க வேண்டும் என அவர் தனது விளக்கத்தில் மேலும் வலியுறுத்தியுள்ளார்.
The post “பிரிந்து செல்லும் எண்ணம் இல்லை”: சர்ச்சைக்குரிய பேச்சு குறித்து அமைச்சர் நந்தா லிங்கி விளக்கம் appeared first on Makkal Osai – மக்கள் ஓசை.
