பொருளாதார வளர்ச்சியில் அமெரிக்காவை முந்தப்போகும் இந்தியா – எலான் மஸ்க் போட்ட பதிவு வைரல் | வணிகச் செய்திகள்

உலக ஜிடிபி வளர்ச்சியில் 26.6 சதவீதத்துடன் சீனா முதலிடத்தையும், 17 சதவீதத்துடன் இந்தியா இரண்டாவது இடத்தையும் பிடிக்கும் என சர்வதேச நாணய நிதியத்தின் தரவுகள் தெரிவித்துள்ளன. அமெரிக்கா 9.9% பங்களிப்புடன் மூன்றாவது இடத்திற்குத் தள்ளப்படும் என்றும் தெரிவிக்கப்பட்டுள்ளது.

இதை தனது எக்ஸ் பக்கத்தில் பகிர்ந்திருந்த உலகின் முன்னணி தொழிலதிபரான எலான் மஸ்க், அதிகார சமநிலை மாறுகிறது என்று பதிவிட்டிருந்தார்.

இந்த நிலையில், நாட்டின் பொருளாதார நிலை குறித்து விமர்சித்த ராகுல்காந்திக்கு எலான் மஸ்கின் பதிவின் மூலம் மத்திய அமைச்சர் கிரண் ரிஜிஜு பதிலளித்துள்ளார்.

அரசை விமர்சிப்பது ஜனநாயக உரிமை என்றாலும், நாட்டை குறைத்து மதிப்பிடாதீர்கள் என்றும், அதன் சாதனைகளை ஒருபோதும் சிறுமைப்படுத்தாதீர்கள் என்றும் அவர் பதிவிட்டுள்ளார்.

முன்னதாக, எலான் மஸ்க் போன்ற சர்வதேசத் தலைவர்களே இந்தியாவின் பொருளாதார வலிமையைக் கண்டு வியப்பதாக நிதியமைச்சர் நிர்மலா குறிப்பிட்டார்.

சீனா மற்றும் இந்தியா இணைந்து உலகப் பொருளாதார வளர்ச்சியில் 43.6% பங்களிப்பை வழங்கப்போகின்றன என்பதை எதிர்க்கட்சிகள் புரிந்து கொள்ள வேண்டும் என குறிப்பிட்டார்.