கோலாலம்பூர்:
ஜாலான் ராசாவில் (Jalan Rasah) நேற்று மாலை 3.30 மணியளவில் நிகழ்ந்த சாலை விபத்தில் 33 வயது மதிக்கத்தக்க பெண் ஒருவர் உயிரிழந்தார். அதே நேரத்தில் நெகிரி செம்பிலான் போலீஸ் தலைமையகத்தில் கார்ப்பரலாகப் பணியாற்றும் 38 வயது போலீஸ் அதிகாரியான அவரது கணவர், தற்போது தீவிர சிகிச்சைப் பிரிவில் உள்ளார்.
அந்தத் தம்பதியினர் தங்களது மோட்டார் சைக்கிளில் சாலையின் இடதுபுற வரிசையில் சென்று கொண்டிருந்தனர். அப்போது அவர்களுக்கு முன்னால் சென்ற ‘புரோட்டான் பெர்சோனா’ (Proton Persona) ரக கார், இடதுபுறம் உள்ள ஒரு சந்திப்பிற்குள் நுழைவதற்காகத் திடீரென வரிசை மாறியுள்ளது. இதனால் எதிர்பாராத விதமாக மோட்டார் சைக்கிளை ஓட்டி வந்த போலீஸ் அதிகாரி, காரின் இடதுபுறத்தில் பலமாக மோதினார் என்று, சிரம்பான் மாவட்ட போலீஸ் தலைவர் உதவி ஆணையர் அஜஹார் அப்துல் ரஹீம் கூறினார்.
மோட்டார் சைக்கிளின் பின்னால் அமர்ந்து பயணித்த அவரது மனைவி, துவாங்கு ஜாஃபர் மருத்துவமனைக்குக் கொண்டு செல்லப்பட்ட சிறிது நேரத்திலேயே உயிரிழந்தார். படுகாயமடைந்த போலீஸ் அதிகாரி அதே மருத்துவமனையில் சிகிச்சை பெற்று வருகிறார்.
இந்த விபத்து தொடர்பாக, அபாயகரமாக வாகனத்தைச் செலுத்தி மரணத்தை ஏற்படுத்திய குற்றத்திற்காக, சாலைப் போக்குவரத்துச் சட்டம் 1987-இன் பிரிவு 41(1)-இன் கீழ் விசாரணை நடத்தப்பட்டு வருகிறது. இக்குற்றம் நிரூபிக்கப்பட்டால் 50,000 ரிங்கிட் வரை அபராதம் அல்லது 10 ஆண்டுகள் வரை சிறைத்தண்டனை விதிக்கப்படலாம்.
இந்த விபத்தைக் நேரில் பார்த்தவர்கள் அல்லது தகவலறிந்தவர்கள் புலனாய்வு அதிகாரி இன்ஸ்பெக்டர் ஜி. சங்கர் (014-6000353) என்பவரைத் தொடர்பு கொள்ளுமாறு அல்லது அருகிலுள்ள போலீஸ் நிலையத்திற்குத் தகவல் தருமாறு கேட்டுக் கொள்ளப்படுகிறார்கள்.
