நட்பு திருமணம் – ஜப்பான் இளைஞர்களின் புதிய கலாச்சாரம்! – News18 தமிழ்

ஜப்பானில் நட்பு திருமணம் என்ற பெயரில் புதிய கலாச்சாரம் அங்குள்ள இளைஞர்களிடையே அதிகரித்து வருகிறது.

ஜப்பான் இளைஞர்களிடையே திருமணத்தில் நாட்டமில்லாதது, ரோபோக்களுடன் குடும்பம் நடத்துவது போன்ற பல்வேறு விவகாரங்களால், அந்நாட்டில் மக்கள் தொகை நாளுக்கு நாள் குறைந்து கொண்டே வருகிறது. இதனால், தொடர்ந்து கவலை தெரிவித்து வரும் ஜப்பான் அரசு, குழந்தை பெறுவதை ஊக்குவிக்க பல்வேறு நடவடிக்கைகளை எடுத்து வருகிறது. இந்நிலையில், நட்பு திருமணம் என்ற புதிய டிரெண்ட் ஜப்பான் இளைஞர்களை ஆட்டிப் படைத்து வருகிறது.

பொதுவாக, ஆணும் பெண்ணும் நண்பர்களாக இருந்து, பின்னர் காதலர்களாகி, திருமணம் செய்வது என்பது பல காலமாக இருக்கும் முறை என்றால், வெறும் நட்பு அடிப்படையில் மட்டும் திருமணத்தை செய்து கொள்வது ஜப்பானில் இருக்கும் புதிய டிரெண்ட். அதாவது, ஒரு ஆணும் பெண்ணும், திருமணம் செய்து, குடும்ப வாழ்க்கைக்குள் நுழைந்தாலும், அவர்களிடையே எந்தவிதமான உடலுறவு மற்றும் பரஸ்பர அன்பு என்பதெல்லாம் இருக்கத் தேவையில்லை.

நட்பு திருமணம் செய்து கொண்ட ஆண், வேறு பல பெண்களுடன் எல்லாவிதமான ஆசைகளையும் தீர்த்துக் கொள்ளலாம். அதேபோல், நட்பு திருமணம் செய்து கொண்ட பெண்ணும், வேறு சிலருடன் தங்களது உடலியல் மற்றும் மனது சார்ந்த அனைத்து தேவைகளையும் நிவர்த்தி செய்து கொள்ளலாம் என்பதுதான் இந்த புதிய திருமணத்தின் சாராம்சம். பெரும்பாலும் ஓரினச் சேர்க்கையாளர்களே இந்த வகை திருமணத்தை நாடுவதாக தெரிவிக்கின்றன புள்ளி விவரங்கள்.

இதையும் படிங்க : அமெரிக்காவில் அதிகம் பேசப்படும் இந்திய மொழிகள்.. தமிழுக்கு எந்த இடம் தெரியுமா?

குடும்பம் ஒன்று தேவை என்றபோதும், அது சுமையாக இருக்கக் கூடாது என கருதும் இளைஞர்கள், இதுபோன்ற நட்பு திருமணத்தில் ஆர்வம் காட்டுவதாக கூறப்படுகிறது. இருப்பினும், உணவு சமையல், துணி துவைத்தல் போன்ற திருமண வாழ்க்கையின் எல்லா அம்சத்தையும் கொண்டிருந்தாலும், உடலுறவு என்ற விஷயத்தில் மட்டும் இருவருக்கும் தொடர்பில்லை.

ஆனால், குழந்தைகளை பெற்று வளர்ப்பதில் ஆர்வம் கொண்ட இவர்கள், செயற்கையான முறைகளில் குழந்தைகளை பெற்றெடுத்து வளர்ப்பதாக கூறுகிறது கலர்ஸ் என்ற ஜப்பான் ஆய்வு நிறுவனம். கடந்த 2015ஆம் ஆண்டில் சுமார் 500 பேர்தான் இந்த நட்பு திருமண வட்டத்தில் இருந்ததாகவும், தற்போது 12 கோடி இளைஞர்கள் இந்த வகையில் திருமணம் செய்து கொண்டிருப்பதாகவும், கலர்ஸ் நிறுவனம் தெரிவித்துள்ளது.

.