கத்தாரில் உள்ள ராணுவ தளத்தில் இருந்து சில படையினரை வாபஸ் பெறும் அமெரிக்கா, பிரிட்டன்

மத்திய கிழக்கில் அதிகரித்து வரும் பதற்ற நிலையைத் தொடர்ந்து, கத்தாரில் அமைந்துள்ள Al-Udeid Air Base ராணுவ தளத்தில் பணியாற்றி வந்த சில அமெரிக்க மற்றும் பிரிட்டிஷ் ராணுவ வீரர்களை அமெரிக்கா மற்றும் ஐக்கிய இராச்சியம் வாபஸ் பெறத் தொடங்கியுள்ளன. ஈரானில் அரசுக்கு எதிரான போராட்டங்களை கடுமையாக அடக்கி வரும் சூழலில், ஈரானுக்கு எதிராக நடவடிக்கை எடுக்க வேண்டுமா என்பதை அமெரிக்க அதிபர் Donald Trump பரிசீலித்து வருவதால் இந்த முடிவு எடுக்கப்பட்டுள்ளதாக தகவல்கள் தெரிவிக்கின்றன.

அமெரிக்க ஊடகமான CBS-க்கு அதிகாரிகள் தெரிவித்த தகவலின்படி, இது முன்னெச்சரிக்கை நடவடிக்கையாக மேற்கொள்ளப்படும் ஒரு பகுதி வாபஸ் பெறுதல் ஆகும். இதேபோல், சில பிரிட்டிஷ் ராணுவ பணியாளர்களும் அங்கிருந்து அகற்றப்பட்டு வருவதாக BBC தெரிவித்துள்ளது. கத்தார் அரசு வெளியிட்ட அறிக்கையில், அமெரிக்கா மேற்கொண்டு வரும் இந்த நடவடிக்கைகள் தற்போதைய பிராந்திய பதற்றங்களை கருத்தில் கொண்டு எடுக்கப்பட்டவை என கூறப்பட்டுள்ளது.

இதற்கிடையில், ஈரானின் தலைநகர் தெஹ்ரானில் செயல்பட்டு வந்த பிரிட்டன் தூதரகம் தற்காலிகமாக மூடப்பட்டுள்ளதாக UK Foreign Office அறிவித்துள்ளது. தற்போது அந்த தூதரகம் தொலைநிலை முறையில் செயல்படும் என்றும் அரசு வட்டாரங்கள் தெரிவித்துள்ளன. அதே நேரத்தில், தோஹாவில் உள்ள அமெரிக்க தூதரகம், தனது பணியாளர்கள் அதிக எச்சரிக்கையுடன் இருக்கவும், அல்-உதேய்த் ராணுவ தளத்திற்கு அவசியமற்ற பயணங்களைத் தவிர்க்கவும் அறிவுறுத்தியுள்ளது.

மனித உரிமை அமைப்புகளின் தகவலின்படி, ஈரானில் சமீப காலமாக நடைபெற்று வரும் அரசுக்கு எதிரான போராட்டங்களை ஒடுக்கியதில் 2,400-க்கும் மேற்பட்டோர் உயிரிழந்துள்ளனர். இந்த பின்னணியில், கத்தார் அரசு, தனது குடிமக்கள் மற்றும் நாட்டில் வசிக்கும் வெளிநாட்டவர்களின் பாதுகாப்பே முதன்மை என்றும், முக்கிய உள்கட்டமைப்பு மற்றும் ராணுவ தளங்களை பாதுகாக்க தேவையான அனைத்து நடவடிக்கைகளும் மேற்கொள்ளப்படும் என்றும் தெரிவித்துள்ளது.

பிரிட்டன் பாதுகாப்பு அமைச்சகத்தின் பேச்சாளர், பாதுகாப்பு காரணங்களால் பிரிட்டிஷ் படையினர் வாபஸ் பெறப்பட்டதாக கூறப்படும் தகவல்களை உறுதிப்படுத்தவோ மறுக்கவோ மறுத்துள்ளார். மத்திய கிழக்கில் உள்ள அமெரிக்காவின் மிகப்பெரிய ராணுவ தளமாக அல்-உதேய்த் தளம் கருதப்படுகிறது. இங்கு சுமார் 10,000 அமெரிக்க ராணுவ வீரர்களும், 100-க்கும் மேற்பட்ட பிரிட்டிஷ் பணியாளர்களும் பணியாற்றி வருகின்றனர். இதில் எத்தனை பேர் வாபஸ் பெறப்படுவார்கள் என்பது குறித்து தெளிவான தகவல் வெளியாகவில்லை.

இதற்கு முன், ஈரானில் போராட்டக்காரர்களை தூக்கிலிடும் நடவடிக்கை தொடருமானால், அமெரிக்கா கடுமையான நடவடிக்கை எடுக்கும் என டிரம்ப் எச்சரித்திருந்தார். இதற்கு பதிலளித்த ஈரான், அமெரிக்கா தாக்கினால் தக்க பதிலடி கொடுக்கப்படும் என தெரிவித்தது. புதன்கிழமை பேசிய டிரம்ப், “ஈரானில் கொலைகள் தற்போது நிறுத்தப்பட்டுள்ளன, தூக்குத் தண்டனைக்கு திட்டம் இல்லை” என நம்பகமான தகவல் கிடைத்துள்ளதாக கூறினார். இருப்பினும், இராணுவ நடவடிக்கை முழுமையாக கைவிடப்பட்டதா என்ற கேள்விக்கு, “நாங்கள் நிலவரத்தை கவனித்து வருகிறோம்” என்ற பதிலை அவர் அளித்தார்.

இதற்கிடையில், Reuters வெளியிட்ட தகவலின்படி, சில படையினருக்கு அல்-உதேய்த் தளத்தை விட்டு செல்ல அறிவுறுத்தப்பட்டாலும், கடந்த ஆண்டு நடந்த ஈரானிய தாக்குதலுக்கு முன் போல பெரிய அளவில் படைகள் வெளியேற்றப்படுவதாக எந்த அறிகுறியும் இல்லை. ஈரான் வெளிநாட்டு அமைச்சர் Abbas Araghchi, அமெரிக்க அதிபருக்கு எச்சரிக்கை விடுத்து, கடந்த ஜூன் மாதத்தில் செய்த தவறை மீண்டும் செய்ய வேண்டாம் என கூறியுள்ளார்.

இதே நேரத்தில், சவூதி அரேபியாவில் உள்ள அமெரிக்க தூதரகம், அந்தப் பிராந்தியத்தில் உள்ள ராணுவ தளங்களுக்கு தேவையற்ற பயணங்களை தவிர்க்குமாறு தனது குடிமக்களுக்கும் பணியாளர்களுக்கும் அறிவுறுத்தியுள்ளது. இத்தாலி மற்றும் போலந்து தங்கள் குடிமக்களை ஈரானை விட்டு வெளியேறுமாறு கேட்டுக்கொண்டுள்ளன. ஜெர்மனி, தெஹ்ரானுக்கு செல்லும் விமானங்களை தவிர்க்குமாறு விமான நிறுவனங்களுக்கு எச்சரிக்கை அறிவிப்பு வெளியிட்டுள்ளது.

ஈரானில் இந்த போராட்டங்கள் கடந்த டிசம்பர் இறுதியில் நாணய வீழ்ச்சி மற்றும் கடுமையான விலைவாசி உயர்வைத் தொடர்ந்து தொடங்கின. பின்னர் அவை அரசியல் மாற்றங்களை கோரும் போராட்டங்களாக மாறி, 1979 இஸ்லாமிய புரட்சிக்கு பிறகு ஆட்சியை எதிர்கொண்ட மிகப்பெரிய சவாலாக உருவெடுத்துள்ளன. அமெரிக்காவை தளமாகக் கொண்ட Human Rights Activists News Agency, இதுவரை 2,403 போராட்டக்காரர்கள் கொல்லப்பட்டதாகவும், 12 குழந்தைகள் உயிரிழந்துள்ளதாகவும் உறுதிப்படுத்தியுள்ளது. மேலும் 18,000-க்கும் அதிகமானோர் கைது செய்யப்பட்டுள்ளதாகவும் தெரிவிக்கப்பட்டுள்ளது. Amnesty International, ஈரானில் பாதுகாப்புப் படைகள் முன்னெப்போதும் இல்லாத அளவில் சட்டவிரோத கொலைகளை மேற்கொண்டுள்ளதாக குற்றம்சாட்டி, ஐநா உறுப்புநாடுகள் இதை அங்கீகரிக்க வேண்டும் என வலியுறுத்தியுள்ளது.