வியாழக்கிழமை வெளியிடப்பட்ட தரவுகளின்படி, மத்திய ஜிஎஸ்டி வசூல் ரூ.34,289 கோடியாகவும், மாநில ஜிஎஸ்டி வசூல் ரூ.41,368 கோடியாகவும் பதிவாகியுள்ளது. அதேபோல், ஒருங்கிணைந்த ஜிஎஸ்டி (IGST) வசூல் ரூ.98,894 கோடியாக உயர்ந்துள்ளது. ஜிஎஸ்டி இழப்பீட்டு செஸ் மூலம் அரசாங்கம் ரூ.4,551 கோடியை வசூலித்துள்ளது. இந்த செஸ் வசூல் முழுமையான கடன் மற்றும் வட்டிப் பொறுப்புகள் தீர்க்கப்படும்வரை, தற்காலிக ஏற்பாடாக மட்டுமே தொடரும் என்றும் தெரிவிக்கப்பட்டுள்ளது.
2024 முழு ஆண்டில் இழப்பீட்டு செஸ் வசூல் ரூ.1.1 லட்சம் கோடியாக இருந்த நிலையில், தற்போதைய நிதியாண்டில் இதுவரை ரூ.88,385 கோடி வசூலாகியுள்ளது. இதற்கிடையில், டிசம்பர் மாதத்தில் ஜிஎஸ்டி பணத்தைத் திரும்பப் பெறுதல் (refunds) ரூ.28,980 கோடியாக இருந்தது. இது கடந்த ஆண்டு இதே மாதத்தில் இருந்த ரூ.22,138 கோடியைவிட கணிசமான உயர்வாகும் என்பது குறிப்பிடத்தக்கது.
செப்டம்பர் 22, 2025 அன்று அமலுக்கு வந்த வரி விகிதக் குறைப்புகளுக்குப் பிறகும் ஜிஎஸ்டி வசூல் வளர்ச்சி கண்டுள்ளது என்பது குறிப்பிடத்தக்கது. வரி விகிதங்கள் குறைக்கப்பட்டதால், நுகர்வோரிடையே பொருட்கள் மற்றும் சேவைகளுக்கான தேவை அதிகரித்தது. இதன் விளைவாக உற்பத்தி, விற்பனை மற்றும் சேவைத் துறைகளில் செயற்பாடுகள் அதிகரித்து, மொத்த வரி வசூலிலும் நேர்மறையான தாக்கத்தை ஏற்படுத்தியுள்ளதாக பொருளாதார நிபுணர்கள் கருதுகின்றனர்.
இதனிடையே, சொகுசுப் பொருட்களுக்கு 40 சதவீதம் வரை புதிய உயர் ஜிஎஸ்டி வரி அடுக்குகள் அமலில் இருப்பதுடன், புகையிலை மற்றும் பான் மசாலா போன்ற பொருட்களுக்கான செஸ் வரி தொடர்கிறது. புகையிலைப் பொருட்களுக்கான புதிய வரி விதிப்பு முறையை 2026 பிப்ரவரி 1 முதல் அமல்படுத்தும் வகையில், நிதி அமைச்சகம் தொடர் அறிவிப்புகளையும் வெளியிட்டு வருகிறது.
சமீபத்தில் முடிவடைந்த நாடாளுமன்ற குளிர்காலக் கூட்டத்தொடரில் நிறைவேற்றப்பட்ட மத்திய கலால் (திருத்த) சட்டம், 2025, அதே தேதியில் நடைமுறைக்கு வரும் என்றும் அரசு உறுதிப்படுத்தியுள்ளது. இந்தச் சட்டம் புகையிலைப் பொருட்களுக்கான புதிய கலால் வரி விகிதங்களை வரையறுக்கிறது. அதேபோல், பான் மசாலா உற்பத்திக்கு செஸ் விதிக்கும் சுகாதாரப் பாதுகாப்பு மற்றும் தேசியப் பாதுகாப்புச் சட்டம், 2025-இன் விதிகளும் அதே நாளில் அமலுக்கு வரும்.
மேலும், ஜிஎஸ்டி ஆட்சியின் கீழ் சிகரெட்டுகளுக்கான கலால் வரி தற்போது ஒரு குச்சிக்கு பெயரளவிலான தொகையாகவே இருந்து வருவதாகவும், 2017 ஜூலை மாதத்தில் அமல்படுத்தப்பட்ட ஜிஎஸ்டி இழப்பீட்டு செஸ் வரி விகிதங்கள் இதுவரை உயர்த்தப்படவில்லை என்றும் விளக்குவதற்காக, நிதி அமைச்சகம் அடிக்கடி கேட்கப்படும் கேள்விகள் (FAQ) பட்டியலையும் வெளியிட்டுள்ளது.
Click here to add News18 as your preferred news source on Google. வரி விகிதக் குறைப்பு இருந்தபோதும், ஜிஎஸ்டி வசூல் உயர்வு…! டிசம்பரில் ரூ.1.74 லட்சம் கோடியை கடந்தது…
