இந்தியாவின் முதல் அதிவிரைவு சோதனை ரயில் பாதை…! புதிய மைல்கல்லை எட்டும் ரயில்வே… | இந்தியா

இந்த 64 கிலோ மீட்டர் நீள சோதனைப் பாதையானது ராஜஸ்தான் மாநிலத்தின் ஜோத்பூர் பிரிவின் கீழ்வரும் குதா மற்றும் தாதானா மித்ரி இடையே அமைக்கப்பட்டு வருகிறது. இந்த ஜோத்பூர் பிரிவு ஜெய்ப்பூரில் இருந்து தோராயமாக 70 கிலோ மீட்டர் தூரத்தில் அமைந்துள்ளது. இந்த ப்ராஜெக்ட் வடமேற்கு ரயில்வே பிரிவின் கீழ் இயங்குகிறது. இந்த பாதையை அமைப்பதற்கு 967 கோடி ரூபாய் ஒதுக்கப்பட்டுள்ளது.

வழக்கமான பயணிகள் அல்லது சரக்கு ரயில் சேவைகளுக்கு எந்த ஒரு இடையூறும் வராமல், அதே சமயத்தில் செயல்திறன், பாதுகாப்பு மற்றும் நீடித்திருக்கும் திறன் ஆகிய சோதனைகளை நடத்துவதற்கு இந்த ரயில் பாதை பயன்படுத்தப்பட உள்ளது. இந்த பாதையில் ஒரு மணி நேரத்திற்கு 220 கிலோ மீட்டர் வேகம் வரை ரயில்களை இயக்கலாம் என்று கணிக்கப்பட்டுள்ளது.

இது தவிர, ராஜஸ்தான் மாநிலத்தில் ரயில்வே அமைப்பை மேம்படுத்துவதற்கு பெரிய அளவிலான தொகையை இந்திய ரயில்வே தொடர்ந்து முதலீடு செய்து வருகிறது. 25 கிலோ மீட்டர் தொலைவு உள்ள உம்ரா – டெபாரி ரயில் பிரிவை இரட்டிப்பாக்குவதற்கு 492 கோடி ரூபாய் தொகையை ரயில்வே அமைச்சர் அஸ்வினி வைஷ்ணவ் அங்கீகரித்துள்ளார். முக்கியமான சுற்றுலா தளமாக இருக்கும் உதய்பூரில் ரயில் கூட்ட நெரிசல்களை தவிர்ப்பதற்கும், ரயில் தொடர்பை மேம்படுத்துவதற்கும் இந்த திட்டம் அமல்படுத்தப்பட உள்ளது.